QR SІM: Koreı túbegindegi denýklearızatsııa úshin eń mańyzdy shart - senimdi nyǵaıtý

ASTANA. QazAqparat - Qazaqstan Koreı túbegindegi denýklearızatsııa úderisin odan ári júzege asyrýdyń eń basty sharty retinde senimdi nyǵaıtý sharalaryn atap ótti, dep habarlaıdy QR SІM baspasóz qyzmeti.

Qazaqstannyń BUU janyndaǵy Turaqty ókili Qaırat Omarov BUU Qaýipsizdik Keńesiniń kezekten tys otyrysynda jappaı qyryp-joıý qarýlarymen baılanysty barlyq problemalyq máselelerdi senim sharalaryn iske asyrý arqyly basty kezekte Reseı, Qytaı jáne Amerıka Qurama Shtattarynyń arasyndaǵy ózara senimdi nyǵaıtý jolymen sheshý qajettigin aıtty.

Qazaqstan Prezıdenti Nursultan Nazarbaev bıylǵy qańtardaǵy Qaýipsizdik Keńesiniń arnaıy tematıkalyq otyrysynda sóılegen sózinde osyndaı úndeýin ortaǵa salǵan bolatyn. Memleket basshysy senim sharalaryn jahandyq qaýipsizdik pen beıbitshilikti nyǵaıtý arhıtektýrasyn saqtaýdyń eń mańyzdy elementi dep atap ótken.

«Búgingi Koreı túbegindegi jaǵdaı osyǵan deıingi eń qolaılylardyń birinen tabylyp otyr jáne ol bizdi odan ári parasatty erik pen ashyqtyq tanytýǵa jáne ózara kelisimge barýǵa ıtermeleıdi» - deı otyryp, Q. Omarov saıası jáne dıplomatııalyq kúsh-jigerlerdiń odan ári sátti túrde jalǵasyn tabatynyna senimin bildirdi.