QR SІM Qoǵamdyq keńeske OA elderimen yntymaqtastyq týraly esep berdi
ASTANA. QazAqparat - Ortalyq Azııadaǵy yntymaqtastyq Qazaqstan Syrtqy ister mınıstrligi qyzmetiniń máseleleri jónindegi Qoǵamdyq keńes otyrysynyń basty taqyryby boldy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Keńes músheleri mezgilsiz ómirden ozǵan «Qazaqstannyń azamattyq alıansy» zańdy tulǵalar birlestiginiń prezıdenti Nurlan Kenjebekuly Erimbetovty bir mınýt únsizdikpen eske aldy. Óziniń kirispe sózinde Keńes tóraǵasy, Parlament Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva N. Erimbetovtiń azamattyq qoǵamdy damytýǵa qosqan eleýli úlesin jáne Qazaqstan Syrtqy ister mınıstrligi janyndaǵy Qoǵamdyq keńestegi tabysty jumysyn atap ótti.
Syrtqy ister mınıstri Qaırat Ábdirahmanov otyrysta negizgi baıandama jasady. Vedomstvo basshysy kórshi eldermen jan-jaqty baılanystardy nyǵaıtý Qazaqstan syrtqy saıasatynyń basymdylyǵy ekenin atap ótti.
«Astana qalasynda 15 naýryzda ótken Ortalyq Azııa memleket basshylarynyń jumys konsýltatıvtik kezdesýi kópten kútken tarıhı oqıǵa boldy jáne birlik pen jańarýdyń belgisi bolyp tabylatyn Naýryz merekesi qarsańynda ótkizilýi ortaq mádenıetimiz ben órkenıetimizdiń uqsastyǵyn kórsetti», - dep atap kórsetti Q.Ábdirahmanov.
Prezıdent N.Á. Nazarbaevtyń tóraǵalyǵymen ótken Astana kezdesýindegi naqty ýaǵdalastyqtarǵa qol jetkizý taraptardyń qaýipsizdik pen turaqtylyqty qamtamasyz etý, óńirlik saýda-ekonomıkalyq yntymaqtastyqty jandandyrý, mádenı-gýmanıtarlyq ózara árekettestikti nyǵaıtý boıynsha yntymaqtastyqty keńeıtýge, sondaı-aq Ortalyq Azııanyń barlyq kúrdeli máselelerin birlesip sheshýge daıyn ekendigin bildirýge múmkindik beredi. Mınıstr eki el arasyndaǵy konstrýktıvti jáne ózara tıimdi qarym-qatynas aımaqtaǵy ózara túsinistik pen yntymaqtastyqty qalyptastyrýdyń alǵysharttaryn jasaıtynyn atap ótti.
Sarapshy Sultan Ákimbekov azamattyq qoǵamnan Ortalyq Azııa aımaǵyndaǵy ekonomıkalyq yntymaqtastyqtyń áleýeti men qaýipsizdigi máseleleri taqyrybynda birlesken baıandama jasady.
Syrtqy ister mınıstriniń orynbasary Roman Vasılenko Qoǵamdyq keńes janyndaǵy saraptamalyq-analıtıkalyq jáne aqparattyq-ımıdjdik toby týraly baıandama jasady. Atalǵan baıandamada syrtqy saıası vedomstvonyń sarapshylar qaýymdastyǵy jáne buqaralyq aqparat quraldarymen ózara árekettestiginiń qazirgi jaǵdaıy men keleshegi týraly tolyq aqparat qamtyldy.
Talqylaý barysynda Keńes músheleri parlamenttik dıplomatııany nyǵaıtý, EAEO qurylymdarynda ulttyq ustanymdardy qorǵaý, «Qazaqstan - Jańa Jibek joly» ınfraqurylymdyq jobasyn damytý, Ortalyq Azııadaǵy gýmanıtarlyq yntymaqtastyqty tereńdetý jáne basqa da qyzmet salalary boıynsha birqatar usynystar jasady.
QR SІM qyzmetiniń máseleleri jónindegi Qoǵamdyq keńestiń kezekti otyrysy 2018 jylǵy kúzge josparlanǵan.
