QR SІM qajylyqqa baratyn Qazaqstan azamattaryn barynsha abaı bolýǵa shaqyrýda
ASTANA. QazAqparat - QR Syrtqy ister mınıstrligi Ońtústik Koreıada júrgen jáne qajylyqqa baratyn Qazaqstan azamattaryn barynsha abaı bolýǵa shaqyrady. Bul týraly búgin atalǵan vedomstvonyń resmı ókili Altaı Ábıbýllaev aıtty.
«Taıaýshyǵystyq respıratorlyq sındromyna baılanysty Ońtústik Koreıadaǵy ahýal óte qıyn bolyp otyr. Qazirgi ýaqytta 2802 adam karantınde, 8 nemese 7 adam qaza tapty. 2208 mektep jabyldy, 95 adam atalǵan vırýsty juqtyrǵan. Búgingi kúni Seýldegi Elshiligimizdiń málimetterine sáıkes bizdiń eldiń shamamen 500 azamaty tirkelgen. Buǵan qosa, Ońtústik Koreıada ýaqytsha 3 myńnan astam azamatymyz júr. Men Qazaqstan men Ońtústik Koreıa arasynda vızasyz rejim ornatylǵandyǵyn atap ótkim keledi. Sonymen birge Qazaqstan men Ońtústik Koreıa arasynda turaqty áýe baılanysy jolǵa qoıylǵan», - dedi ol.
Osy rette SІM resmı ókili Ońtústik Koreıada júrgen barlyq Qazaqstan azamattaryn abaı bolýǵa shaqyrdy. Ol vırýsqa shaldyǵý deregi 2012 jyly tirkelgendigin, onyń Taıaý Shyǵys elderinen oralǵan koreılik bolǵandyǵyn eske saldy.
Sonymen qatar A.Ábıbýllaev 18 maýsymynan Ramazan aıy bastalatyndyǵyn, ol aıaqtalǵannan keıin kóptegen qazaqstandyqtar Saýd Arabııasyna qajylyqqa atanatyndyǵyn atap ótti. Bul elde taıaýshyǵystyq respıratorlyq sındromyna shaldyǵyp, 95 adam mert bolǵan. Sondyqtan atalǵan elge barǵanda barynsha abaı bolǵan jón.
Resmı ókil munan bólek, Qazaqstanǵa vırýstyń taralýyna jol bermeý maqsatynda halyqaralyq áýejaılar sáıkesinshe jumys rejimine kóshiretindigin basa aıtty.
