QR SІM qazaqstandyqtarǵa kem degende taǵy bir apta Mysyrǵa barmaı tura turý jóninde usynys jasady

«Mysyr elindegi qazirgi jaǵdaıǵa baılanysty QR Syrtqy ister mınıstrliginiń Qazaqstan azamattaryna asa shuǵyl bolmaǵan jaǵdaıda Mysyrǵa sapar jasamaý týraly aıtylǵan usynysy aǵymdaǵy jyldyń 21 aqpanyna deıin uzartyldy», - delingen vedomstvonyń resmı málimdemesinde.

Esterińizge sala keteıik, 7 aqpanda QR SІM Qazaqstan azamattaryna Mysyrǵa saparǵa shyqpaýǵa keńes bergen bolatyn. «Keshe, búgin Mysyrdaǵy jaǵdaı sál turaqtana bastaǵan sekildi. Soǵan qaramastan, ondaǵy ahýal kúrdeli bolyp qalýda. Sondyqtan bizdiń azamattarǵa Mysyrǵa ázirshe barmaý jóninde keńes beremiz», - dep atap kórsetken bolatyn QR SІM-niń resmı ókili 7 aqpandaǵy brıfıngte.

Aıta keteıik, Mysyrdy 30 jyl basqarǵan Hosnı Múbárak eki aptadan ýastam ýaqytqa sozylǵan halyqtyń jappaı tolqýynan keıin 11 aqpanda bılikten ketti. Onyń taqty qaldyrýyna eldegi ekonomıkalyq jáne áleýmetik jaǵdaıdyń nasharlap ketýi, ishki qaýipsizdik júıesindegi olqylyqtar yqpal etti. Hosnı Múbárak bılikti Mysyrdyń Qarýly Kúshteriniń Joǵarǵy keńesine berdi. Óz kezeginde áskerıler el konstıtýtsııasynyń kúshin toqtatyp, Parlamentti taratyp jiberdi jáne jarty jyldyń ishinde demokratııalyq saılaýlar ótkizip, memleketti basqarýdy legıtımdi bılikke berýdi qamtamasyz etýge ýáde berip otyr.