QR SІM qazaqstandyq dıplomat Maksım Solınniń qaza bolǵanyn habarlady
ASTANA. QazAqparat - 21 qazan kúni QR Syrtqy ister mınıstrligi Eýropa departamenti dırektorynyń orynbasary Maksım Solın kóz jumdy.
Bul týraly dıplomatııalyq vedomstvo Facebook-taǵy paraqshasynda jazdy.
«Qaıǵyly oqıǵa saldarynan dosymyz ári áriptesimiz Solın Maksım Aleksandrovıch kóz jumdy. Ol dıplomat mansabyn QR SІM-niń negizi qalanǵan 1992 jyly bastady. Qazaqstannyń Belgııa jáne Frantsııadaǵy elshilikterinde eńbek etti. Birinshi sanattaǵy keńesshi dıplomatııalyq shenine ıe. Maksım Aleksandrovıch frantsýz, aǵylshyn, qazaq tilderinde erkin sóıleıtin», - delingen habarlamada.
2010 jyly syrtqy saıasat salasyndaǵy sińirgen eńbegi úshin Maksım Solınge Prezıdent Nursultan Nazarbaevtyń alǵysy jarııalanǵan bolatyn.
Maksım Solın 1970 jyly 4 tamyzda dúnıege kelgen. Artynda áıeli men balasy qaldy.
Qoshtasý rásimi 23 qazan kúni saǵat 11.00-de Astanada, Jansúgirov kóshesi, 1 meken jaıynda ótedi.
