QR SІM: Qazaqstandaǵy Aýǵanstan elshiligi qyzmetin toqtatpaıdy

NUR-SULTAN. QazAqparat – Elimizdegi Aýǵanstan memleketiniń elshiligi jumysyn jalǵastyra beredi. Bul týraly QR Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

Tilshiler QR Syrtqy ister mınıstrligine «Qazaqstanda turyp jatqan Aýǵanstan azamattarynyń taǵdyry ne bolady? Onyń ishinde el aýmaǵynda bolý merzimi bitetin aýǵan azamattary men stýdentter de bar», - degen saýal qoıdy.

Óz kezeginde QR Syrtqy ister mınıstrliginiń resmı ókili Aıbek Smadııarov Qazaqstandaǵy Aýǵanstan elshiligi óz qyzmetin jalǵastyryp jatqanyn jetkizdi.

«Qazaqstan aýmaǵyndaǵy Aýǵanstan azamattary eline oralýǵa qatysty suraqqa jaýapty elordadaǵy óz elshilikterinen bile alady. Azamattar júgingen jaǵdaıda Qazaqstandaǵy Aýǵanstan elshiligi máseleni bizdiń quzyrly organdarmen birlesip qarastyrady. Al Qazaqstan aýmaǵynda resmı qyzmet etip nemese bilim alyp jatqan aýǵan azamattary jumysy men oqýyn jalǵastyra beredi», - dep jaýap berdi A. Smadııarov.

Sonymen qatar, mınıstrlik ókili Aýǵanstandaǵy máselege qatysty suraqtardyń jaýabyn elshilik qyzmetkerlerinen bilýge bolatynyn aıtty.

Buǵan deıin elimizdiń Syrtqy ister mınıstrligi Qazaqstan aýǵan bosqyndaryn qabyldaýy múmkin degen qaýesetke qatysty túsinikteme bergen edi. Sondaı-aq, Aýǵanstan aýmaǵynda qalyp, elge qaıtqysy kelgen qazaqstandyqtardyń qaıda habarlasýy kerektigi aıtyldy.