QR SІM Qazaqstan Iranǵa ýran satpaq boldy degen jalǵan aqparattyń shyqqan kózin anyqtaýmen aınalysyp jatyr
ASTANA. Qańtardyń 18-i. QazAqparat /Ernur Aqanbaı/ - QR Syrtqy ister mınıstrligi Qazaqstan Iranǵa ýran satpaq boldy degen jalǵan aqparattyń shyqqan kózin anyqtaýmen aınalysyp jatyr. Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov aıtty,
dep habarlaıdy QazAqparat.
«Qazirgi ýaqytta QR Syrtqy ister mınıstrligi osy jalǵan aqparattyń paıda bolý sebepterin jáne kózderin anyqtaýmen analysýda jáne ıadrolyq qarýdy taratpaý isindegi jahandyq kóshbasshylardyń biri bolyp tabylatyn Qazaqstannyń bedelin odan ári nyǵaıtý jónindegi jumysty jalǵastyrýda», dedi brıfıngte A. Ábdirahmanov.
Onyń aıtýynsha, múddeli memlekettik organdar júrgizgen jumystyń qorytyndysy boıynsha, «Assoshıeıted Presstiń» maqalasynda keltirilgen Qazaqstannyń Iranǵa ýran satpaq bolǵany týraly faktiler qýattalmaǵan. Resmı ókil mundaı mámilelerdi jasaý tipti teorııa júzinde múmkin emestigin atap kórsetti. «Qazaqstannyń atom tehnologııasy salasyndaǵy búkil qyzmeti tolyqtaı MAGATE-niń standarttaryna sáıkes jáne MAGATE-niń baqylaýymen júzege asyrylady», dedi ol.
«QR Syrtqy ister mınıstrligi «Assoshıeıted Presti» qosqanda, taratylǵan aqparattardyń shynaıylyǵyna jaýaptylyqty búkil BAQ-tyń qyzmetindegi prıntsıpterdiń biri dep esepteıdi, taratylǵan aqparattar qýattalmaǵan jaǵdaıda joqqa shyǵarylýy qajet», dedi A. Ábdirahmanov.
Onyń sózine qaraǵanda, ótken juma kúni QR Memlekettik hatshysy-Syrtqy ister mınıstri Qanat Saýdabaevtyń MAGATE-niń Bas dırektory ıÝkıo Amanomen bolǵan kezdesýinde, sońǵysy Qazaqstan tarapyn «Assoshıeıted Prestiń» maqalasynda kórsetilgen jalǵan málimetterdi dereý joqqa shyǵarǵandyǵy úshin Qazaqstan tarapyna alǵysyn bildirgen jáne bul jaǵdaıdy birjaqty aıqyndap bergenin ári MAGATE óz jumysynda osy pozıtsııaǵa arqa súıeıtinin aıtqan.
