QR SІM Kabýldaǵy lańkestik saldarynan Qazaqstan azamatshasynyń qaza tapqanyn rastady

«13 mamyrda Kabýldaǵy «Park Palace Hotel» qonaq úıinde bolǵan qarýlanǵan lańkesterdiń shabýyly saldarynan 1987 jyly týǵan QR azamatshasy Abdýllaeva Aıgerim qaza tapty. Vedomstvo kóz jumǵan azamatshanyń týystaryna kóńil aıtady», delingen syrtqy saıası vedomstvonyń habarlamasynda.

A.Abdýllaeva Aýǵanstanǵa alǵash ret aǵymdaǵy jyldyń aqpanynda óziniń jary, Aýǵanstan Islam Respýblıkasynyń ındýstrııa jáne saýda mınıstrliginde sheteldik keńesshi bolyp jumys istegen Italııa azamatymen barǵan. Aǵymdaǵy jyldyń 20 sáýirinde Astanadaǵy demalysynan soń ol Kabýlǵa qaıta oralǵan.

13 mamyrda atalǵan qonaq úıde turatyn sheteldikter úshin keshki saǵat altyda mýzykalyq kontsert uıymdastyryldy. Shara barysynda qarýlanǵan bir top lańkes kontsertte óner kórsetýshilerge shabýyl jasaǵan. Lańkester qonaq úıdiń kúzetshilerin óltirip tastaǵandyqtan, polıtsııa qyzmetkerleri qonaq úı keshenine birden kire almady. Lańkester sheteldik azamattardy kepildikke alǵan. Qaqtyǵys 7 saǵatqa sozyldy. Shabýyl jasaǵandardyń barlyǵy óltirildi.

Lańkesterdiń áreketi saldarynan sonymen qatar AQSh, Ulybrıtanııa, Italııa jáne Úndistan azamattary men jergilikti turǵyndar kóz jumdy.

Kabýldaǵy QR Elshiligi atalǵan jaǵdaıǵa qajetti barlyq konsýldyq-quqyqtyq isterdi atqaryp jatyr. Olar qaza tapqan qazaqstandyqtyń máıitin týǵan jerge jetkizý boıynsha qoldaý kórsetýge ázir.