QR SІM: Izraıldegi Dıana Nazar men basqa da qazaqstandyqtar taıaý aralyqta urys amaldary júrip jatqan aımaqtan shyǵarylady
Bul týraly QazAqparat tilshisine QR Syrtqy ister mınıstrliginiń resmı ókili Nurjan Aıtmahanov málim etti.
«Syrtqy ister mınıstrligi bizdiń azamatymyz Dıana Nazarmen habarlasty. Ózderińizge málim bolǵandaı, keshe ol Izraılden Túrkııaǵa usha almaı qalǵan edi. Onyń sózine qaraǵanda, jaǵdaıy jaqsy, áýe kompanııasy oǵan qonaqúıge toqtaýǵa múmkinshilik jasaǵan. Sonymen qatar bizdiń Izraıldegi Elshiliktiń habarlaýynsha, búgin Túrkııa áýe kompanııasy jergilikti ýaqytpen saǵat 21-ge reıs josparlap otyr. Sol reıspen azamatshamyz Túrkııaǵa oralmaq», - dedi N.Aıtmahanov.
Onyń atap ótýinshe, budan bólek quramynda 10-15 adam bar qazaqstandyq týrıster toby da Túrkııaǵa usha almaı qalǵan. Degenmen bizdiń azamattardyń naqty sany anyqtalý ústinde. Tasymaldaýshy áýe kompanııasy olardyń barlyǵyn da qonaqúıge ornalastyrǵan. Olar da búgin keshkisin túrkııalyq áýe kompanııasymen ushyp shyǵady.
«Syrtqy ister mınıstrligi bizdiń azamattarymyzdyń barlyǵy da Túrkııaǵa ushyp ketkenshe bul máseleni jiti baqylaýǵa alady jáne qajetti barlyq kómekti kórsetedi», - dedi SІM ókili.
Esterińizge sala keteıik, buǵan deıin QR IJTM Týrızm ındýstrııasy komıteti barsha qazaqstandyqtardy Izraılde oryn alyp otyrǵan ahýalǵa baılanysty abaı bolýǵa jáne muqııattylyq tanytýǵa shaqyrǵan edi.