QR SІM Italııadaǵy jer silkinisinen zardap shekkender arasynda qazaqstandyqtardyń bar-joǵyn anyqtaýda
ASTANA. QazAqparat - QR Syrtqy ister mınıstrligi Italııanyń Amatrıche qalasyndaǵy jer silkinisi saldarynan zardap shekkender arasynda qazaqstandyqtardyń bar-joǵyn anyqtaýda. Bul týraly «QazAqparatqa» QR Syrtqy ister mınıstrligi baspasóz qyzmetiniń jetekshisi Ánýar Jaınaqov habarlady.
«Ázirge, bizdiń azamattar týraly aqparat kelip túsken joq, áli de tekseretin bolamyz», - dedi Á. Jaınaqov.
Buqaralyq aqparat quraldarynyń habarlaýynsha, Amatrıche qalasyndaǵy zilzaladan shahardaǵy kóptegen nysandar qırap, adamdar ǵımarattardaǵy úıindiler astynda qaldy.
Budan buryn eýropalyq EMSC seısmologııalyq ortalyǵy Italııanyń ortalyq bóliginde 6,1 magnıtýdasymen jer silkinisi oryn alǵanyn habarlady. AQSh geologııalyq qyzmetiniń málimetinshe, jerasty dúmpýiniń kúshi 6,2-ge jetken. Ázirge zardap shekkender boıynsha naqty aqparat taratylǵan joq.
