QR SІM Evgenıı Prýdnıkov qazasy jaıynda: Júregi toqtap qalǵan
ASTANA. QazAqparat - Qazaqstan azamaty Evgenıı Prýdnıkov Odessa qalasynda kóz jumdy. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«1985 jyly dúnıege kelgen Qazaqstan azamaty Evgenıı Prýdnıkov Odessa qalasynda qaıtys boldy. Aldyn ala málimetterge sáıkes, júregi toqtap qalǵan. Keshe keshkisin Borıspol áýejaıynan Kıev-Almaty baǵdarymen onyń múrdesi Qazaqstanǵa jetkizildi», - dedi ol.
Aıta keteıik, Evgenıı Prýdnıkov Qaraǵandy medıtsına ınstıtýtyn balalar hırýrgi mamandyǵy boıynsha bitirgen. Ol IPF paýerlıftıngten QR sport sheberi, bodıbıldıngten Qazaqstan quramasynyń múshesi bolǵan. Qazaqstannyń birneshe dúrkin chempıony atandy.
