QR SІM: Elbasynyń Mınskige sapary Qazaqstan-Belarýs áriptestigin nyǵaıta túsedi

ASTANA. QazAqparat - Memleket basshysy Nursultan Nazarbaevtyń Mınskige saparynyń baǵdarlamasy eki negizgi bólikten turady - Belarýs Respýblıkasyna resmı sapary jáne UQShU Ujymdyq qaýipsizdik keńesiniń sessııasyna qatysýy. Bul týraly  «QazAqparat» tilshisine QR Syrtqy ister mınıstrligi Halyqaralyq aqparat komıtetiniń tóraǵasy Talǵat Jumaǵulov málim etti.

«Qazirgi kezde Qazaqstan-Belarýs ekijaqty qarym-qatynastary órkendeý ústinde. Bizdiń yntymaqtastyǵymyz strategııalyq sıpatqa ıe boldy. Eki el UQShU men EAEO - iri eýrazııalyq birlestikteriniń negizin qalaýshylar bolyp tabylady. TMD elderi arasynda Qazaqstan Belarýstiń úsh iri saýda-ekonomıkalyq seriktesteriniń biri bolyp tabylady. 2017 jyldyń 9 aıy ishinde taýar aınalymy 441,4 mıllıon dollardy quryp, 60 paıyzǵa artty», - dep atap ótti syrtqy saıası vedomstvonyń ókili.

Talǵat Jumaǵulovtyń aıtýynsha, eki el basshylary saýda-ekonomıkalyq salasyndaǵy, atap aıtqanda, ónerkásiptik, kólik jáne tranzıt, ǵarysh salalaryndaǵy yntymaqtastyqty nyǵaıtý jáne aqparattyq-kompıýterlik tehnologııalardy damytý máselelerin talqylaıdy dep kútilýde. Qazaqstan Prezıdentiniń sapary aıasynda ótetin Qazaqstan-Belarýs bıznes forýmy osy máselelerge baǵyttalatyn bolady.

«Qazirdiń ózinde Qazaqstan men Belarýs ónerkásip salasynda óte jemisti yntymaqtastyqty damytýda», - dep qosty SІM Komıtetiniń tóraǵasy.

Qaraǵandyda karerler men shahta tehnıkasy, Semeı, Qostanaı, Pavlodar, Oralda traktorlar, astyq jáne jem-shóp jınaıtyn kombaınder, qozǵaltqyshtar, shóp jınaǵyshtar, mamandandyrylǵan (kommýnaldyq jáne órt) tehnıkalar, túrli aýylsharýashylyq tehnıkalary jáne Aqtóbede ártúrli medıtsınalyq jabdyqtar qurastyrylady.

Mádenı-gýmanıtarlyq jáne ǵylymı-tehnıkalyq salalardaǵy qatynastarymyz qaryshty damyp keledi. 2012 jyly Belarýs ulttyq tehnıkalyq ýnıversıtetiniń janynda Abaı atyndaǵy Qazaq tili, tarıhy jáne mádenıeti ortalyǵy ashyldy, al 2013 jyly L.Gýmılev atyndaǵy Eýrazııa ulttyq ýnıversıtetiniń janynda Belarýs tili, tarıhy jáne mádenıeti ortalyǵy jumys isteı bastady. Ǵylymı-tehnıkalyq yntymaqtastyq jónindegi Qazaqstan-Belarýs komıssııasy jumys isteıdi.