QR SІM Edýard Lımonovtyń Qazaqstannyń soltústik oblystaryn kúshtep qosyp alý týraly málimdemesine óz jaýabyn berdi

«Biz Edýard Lımonovtyń Qazaqstannyń soltústik oblystaryn Reseıge qosý týraly málimdemesin nazarǵa aldyq. Lımonov myrza Reseı Federatsııasynyń resmı tulǵasy bolyp tabylmaıtyndyǵyn jáne onyń erkin bildirmeıtindigin túsinemiz. Onyń málimdemesiniń eshbir negizi joq jáne tek kúlki úshin aıtylǵan dúnıe dep qabyldaýǵa bolady. Degenmen, biz Reseı Federatsııasynyń atyna resmı nota joldap, Lımonovqa qatysty olardyń resmı túsinigin alýdy sheshtik. Búgin bul nota dıplomatııalyq arnalar arqyly joldanady», - delingen mınıstrliktiń habarlamasynda.

«Reseı - bizdiń dosymyz, odaqtasymyz jáne strategııalyq áriptesimiz. Lımonov myrzanyń maǵynasyz málimdemesi Reseı memleketiniń Qazaqstanǵa qatysty syrtqy saıasatymen eshbir baılanysy joq. Lımonov myrzanyń jón-josyqsyz qylyǵyna Reseı tarapy tıisti baǵasyn beretinine esh kúmándanbaımyz», - delingen qujatta.

QR SІM bul nota barlyq shetel qaıratkerlerine Qazaqstan táýelsizdigi, egemendigi men jeriniń birtutastyǵy myzǵymas berik ári oǵan qol suǵylmaıtyndyǵyn bildirýi tıis ekendigin habarlady. Sondyqtan bul qundylyqqa qol suǵýǵa tyrysatyn kez kelgenine tıisti jaýap qaıtaratyndyǵyn málim etti.

Syrtqy saıasat vedomstvosy E.Lımonovtyń bul qadamyna qatysty sharalardy qabyldaýdy Reseı tarapynyń qaraýyna qaldyratynyn da atap ótti.

QR SІM habarlaýynsha, bul málimdemege nazar aýdarmaı, «ıt úredi, kerýen kóshediniń» keıpin jasaýǵa bolar edi, biraq memlekettiń egemendigi men jeriniń birtutastyǵyna kúmán keltiretin sózderden keıin óz jaýabyn berý jóninde sheshim qabyldandy.

«Eger Lımonov myrza ózge taqyryptardy sóz etken bolsa, biz oǵan tipti mán bermes edik, alaıda memlekettiń egemendigi men jeriniń birtutastyǵy syndy qasıetti uǵymdar týraly sóz bolǵandyqtan, biz buny jaýapsyz qaldyrmaýdy oıladyq», - delingen habarlamada.