QR SІM-de ıadrolyq qarýdan azat aımaqtar arasyndaǵy yntymaqtastyq talqylandy

NUR-SULTAN. QazAqparat - QR Syrtqy ister mınıstrliginde ıadrolyq qarýdan azat aımaqtar arasynda yntymaqtastyqty nyǵaıtýǵa arnalǵan semınar ótti, dep habarlaıdy QazAqparat vedomstvoǵa silteme jasap.

BUU-nyń Qarýsyzdaný máseleleri jónindegi basqarmasymen (UNODA) birlesip uıymdastyrylǵan sharaǵa ıadrolyq qarýdan azat barlyq aımaqtar (ıAQAA), qyzyǵýshylyq tanytqan halyqaralyq jáne óńirlik uıymdar, baqylaýshy memleketter ókilderi qatysty.

QR Syrtqy ister mınıstriniń orynbasary Erjan Ashyqbaev QR Tuńǵysh Prezıdenti – Elbasy Nursultan Nazarbaevtyń ıadrolyq qarýdan azat aımaqtar arasynda dıalog qalyptastyrý bastamasyn ilgeriletýdegi rólin jáne Qazaqstannyń BUU Bas hatshysy Antonıý Gýterrıshtiń Qarýsyzdaný jónindegi kún tártibin iske asyrýǵa qosqan úlesin atap ótti. Sondaı-aq, halyqaralyq qaýipsizdik úshin jahandyq qaýip-qaterlerdiń kóbeıýi jaǵdaıynda ıAQAA qatysýshy-memleketter arasyndaǵy yntymaqtastyqtyń mańyzdylyǵyna nazar aýdardy.

Osy rette ol Qazaqstan jahandyq antııadrolyq qozǵalys kóshbasshylarynyń biri retinde ıadrolyq qarýdan azat álem qurý maqsatynda odan ada aımaqtardy nyǵaıtýdy jáne olardyń geografııasyn keńeıtýdi qoldap kelgendigin atap ótti.

Semınar jumysyna ıadrolyq qarýdan azat aımaqtar, olardyń arasynda Afrıkaq (Pelındaba kelisimi), Latyn Amerıka (Tlatelolko kelisimi), Ońtústik-Tynyq muhıt (Rarotonga kelisimi), Ortalyq Azııa (Semeı kelisimi) jáne Ońtústik-Shyǵys Azııa (Bangkok kelisimi) óńirleriniń ókilderi qatysty.

«Іs-shara Semeı ıadrolyq synaq alańynyń jabylýynyń tarıhı kúni bolyp tabylatyn 29 tamyzda, álemdik deńgeıde atalyp ótetin ıAdrolyq synaqtarǵa qarsy is-qımyldardyń halyqaralyq kúnine oraılastyrylǵan. Qazaqstannyń óz aýmaǵynda osyndaı is-sharany uıymdastyrý týraly sheshimi QR Tuńǵysh Prezıdenti – Elbasy N.Nazarbaevtyń bastamasyna negizdeledi. Ol elimizdiń atalǵan is-sharany júzege asyrý nıeti týraly 2017 jylǵy 29 tamyzda, AEHA Tómen baıytylǵan ýran banki ǵımaratynyń ashylý rásiminde jarııalaǵan bolatyn.

Semınarǵa qatysýshylar, buǵan deıin qurylǵan jáne jańadan paıda bolatyn zonalar arasyndaǵy uzaq merzimdi saıası yntymaqtastyqtyń naqty mehanızmderin qalyptastyrý maqsatynda, ıadrolyq qarýdan azat aımaqtardy ınstıtýtsıonalızatsııalaýdyń birlesken josparlaryn talqylaýdy josparlap otyr», - delingen SІM aqparatynda.