QR SІM Bostondaǵy is boıynsha qazaqstandyq stýdentter úshin qorǵaýshylardy jaldaýǵa kómektesti
ASTANA. QazAqparat - AQSh-taǵy qazaqstandyq dıplomattar «Bostondyq terakt» isi boıynsha aıyptalyp otyrǵan otandyq stýdentter úshin qorǵaýshylardy jaldaýǵa kómektesti. Bul týraly QR SІM baspasóz qyzmetinen habarlandy.
«QR Syrtqy ister mınıstrligine 2013 jylǵy Boston marafonyndaǵy jarylystan keıingi sottyq tergeýge tartylǵan qazaqstandyqtardyń isi boıynsha kómek kórsetýde QR SІM qandaı ról atqarýda degen saýal kelip tústi. Osy oraıda aıtarymyz, dıplomatııalyq mıssııalarda sottaǵy aıyptalýshylarǵa zańgerlik qorǵaýdy júzege asyrý quzyrettiligi joq ekenin eskere otyryp, qorǵaýshylardy jaldaý boıynsha olardyń ata-analaryna kómek kórsetildi», - delingen taratylǵan málimette.
Sonymen qatar, qysqa merzimde tutqynda otyrǵan stýdentterge jaqyndarynyń kezdesýi máselesi sheshildi. Jáne qorǵaýshylar kez kelgen kúni olarǵa barý quqyǵyna ıe boldy.
QR SІM málimetine qaraǵanda, Qazaqstan konsýly sońǵy ret qazaqstandyqtar otyrǵan túrmege 30 sáýirde baryp qaıtqan.
«Qamaýda otyrǵan stýdentterdiń densaýlyǵy men psıhologııalyq jaǵdaı qalypty. Olardyń qorǵaýshylarmen jáne ata-analarymen baılanysy turaqty túrde iske asyrylady. Sonymen birge ata-analaryna vızalar alýǵa kómek kórsetildi. Atalǵan másele QR SІM-niń erekshe qadaǵalaýynda»,-delingen vedomstvo habarlamasynda.
Esterińizge sala keteıik, Boston marafonynyń máresinde bolǵan jarylysqa qatysty isti tergeýge kedergi keltirdi dep aıyptalǵan Dıas Qadyrbaev pen Azamat Tájaıaqovqa qatysty sot isi protsesi 2014 jyldyń maýsymyna belgilendi.
