QR SІM BAQ ókilderin aqparattardy burmalamaı, barynsha naqty taratýǵa shaqyrdy
NUR-SULTAN. QazAqparat - Qazaqstan Respýblıkasynyń Syrtqy ister mınıstrligi buqaralyq aqparat quraldarynyń ókilderin aqparattardy burmalamaı, naqty berýge shaqyrdy, dep habarlaıdy QazAqparat.
Mınıstrlik málimetterine qaraǵanda, buǵan búgingi tańda qalyptasqan jaǵdaı sebep bolyp otyr.
Naqtyraq aıtqanda, qazirgi tańda keıbir buqaralyq aqparat quraldary tarapynan Qazaqstan men Qytaıdyń syrtqy ister vedomstvolary basshylarynyń qorytyndylaryn burmalap berý jaǵdaılary baıqalyp otyr.
Osyǵan baılanysty QR Syrtqy ister mınıstrligi qalyptasqan jaǵdaıǵa túsinik berý qajet degen sheshimge kelgen.
Birinshiden, Qazaqstan terrorızm, ekstremızm jáne separatızm sııaqty zulymdyqtarmen kúreste qashanda Qytaıdy qoldap keldi. Bul týraly ekijaqty qujattarda naqty aıtyldy. Bul másele sonymen qatar Qazaqstan men Qytaıdyń 2018 jyldyń 1 maýsymyndaǵy birlesken Málimdemesinde de kórinis tapty. Bul týraly Beıbit Atamqulovtyń resmı sapary barysynda ótken Qazaqstan-Qytaı kelissózderi barysynda da sóz boldy. Osy másele týrasynda Qytaıdyń Syrtqy ister mınıstri de málimdeme jasady.
Ekinshiden, Qytaı aýmaǵynda turatyn etnıkalyq qazaqtarǵa keletin bolsaq, Qazaqstan olardy ekijaqty dostyq qatynastardyń mańyzdy faktory retinde qarastyrady. Qazaqstan men Qytaı tarapynyń bul máselege kelgendegi kózqarasy da bir. Beıjińde bolǵan kezdesýde qalyptasqan máselelerdi eki tarap ta sheshýge umtylatyny aıtyldy. Bul másele eki eldiń syrtqy ister vedomstvolarynyń jumys babynda qozǵalyp otyrady. Sondaı-aq konsýldyq qyzmetterdiń jumysyn jandandyrý týraly másele qoıylǵan. Bul baǵyttaǵy jumystar aldaǵy ýaqytta jalǵasa beredi.
Qazaqstannyń Syrtqy ister mınıstrligi BAQ ókilderin aqparattardy ár jerinen julmalamaı, maǵynasyn burmalamaı, naqty berýge shaqyrady. Bul ásirese qalyń kópshiliktiń erekshe nazarynda turǵan máselelerge qatysty.
Qazaqstan men Qytaı eki eldiń halyqtary arasyndaǵy dostyq pen strategııalyq áriptestikti nyǵaıta beredi.
