QR SІM Bahreınnen 18 jasar qyzdy elge qaıtarý merzimin aıtty
ASTANA. QazAqparat - 18 jasar qaraǵandylyq qyz Bahreınge tabysy joǵary jumysty tabý maqsatymen barǵan, alaıda bul elge jetken bette seksýaldy quldyqqa túsken.
«Ony elge qaıtarý máselesi qazirgi kezde qarastyrylyp jatyr. Osy rette naqty merzimdi qazir aıta almaımyn. Búginde tergeý amaldary júrip jatyr jáne bul jumystar aıaqtalǵannan keıin qyzdy elge qaıtarý máselesi sheshiledi»,-dedi QR SІM baspasóz qyzmetiniń jetekshisi Ánýar Jaınaqov «QazAqparat» tilshisine bergen suhbatynda.
«Atalǵan qyzǵa baılanysqa shyǵýǵa tyıym salyndy dep taraǵan aqparat shyndyqqa saı emes. Bahreın polıtsııasy qazaqstandyq qyzǵa qonaq úıde bolǵan kezde jergilikti turǵyndardan eshkimmen baılanysqa shyqpaýdy usyndy. Bul rette tyıym salynyp otyrǵan joq, ıaǵnı polıtsııa onyń qaýipsizdigi turǵysynda eskertý jasady. Atap aıtqanda, tergeý amaldary aıaqtalǵannan soń, qyzdy Qazaqstanǵa qaıtarý máselesi sheshimin tabady»,-dep naqtylady QR SІM baspasóz qyzmetiniń jetekshisi.
Esterińizge sala keteıik, birneshe kún buryn 18 jasar qaraǵandylyq qyz seksýaldy quldyqtan bosatyldy. Osy rette ony bosatýǵa qazaqstandyq dıplomattar járdemdesti.
Qazaqstandyq azamatsha kómek kórsetý týraly janaıqaıyn BAQ arqyly habarlady. Ony atalǵan elge aldap aparǵan. Bahreındegi qonaq úıge jetken kezde onyń tólqujatyn tartyp alyp, jezókshelikpen aınalysýǵa májbúrlegen.
