QR SІM Antalııadaǵy jol apatynan zardap shekkenderdiń ishinde qazaqstandyqtardyń bar-joǵyn anyqtaýda
ASTANA. QazAqparat - Qazaqstan Respýblıkasynyń Syrtqy ister mınıstrligi Túrkııanyń Antalııa qalasyndaǵy jol-kólik oqıǵasynyń saldarynan zardap shekkenderdiń arasynda qazaqstandyqtardyń bar-joǵyn anyqtaý ústinde, dep habarlaıdy «QazAqparat» HAA tilshisi QR SІM baspasóz qyzmetiniń basshysy Ánýar Jaınaqovqa silteme jasap.
Ánýar Jaınaqov buqaralyq aqparat quraldaryna bul týraly aqparatty bilgennen keıin birden habar berýge ýáde berdi.
Eske sala ketsek, Antalııadaǵy jol-kólik oqıǵasy saldarynan 20 týrıst zardap shekken bolatyn. Bul týraly Dogan agenttigi habarlaǵan. Agenttiktiń aqparatyna sáıkes, sheteldik jáne jergilikti týrısterdi alyp ketip bara jatqan shaǵyn avtobýs Antalııa-Kemer baǵytyndaǵy jer asty jolynan shyǵyp kele jatyp aýdarylyp qalǵan. Júrgizýshi jańbyrdyń saldarynan rólge ıe bola almaı qalǵan. Týrısterdiń qaı elden kelgeni jazylmaıdy. Zardap shekkenderdiń bári aýrýhanaǵa jetkizilgen.
