QR SІM AQSh-ta jol kólik apatynda qaza bolǵan QR azamatyn Otanyna jetkizýge járdemdesetinin málimdedi

ASTANA. 30 qyrkúıek. QazAqparat - 25 qyrkúıekte Chıkago qalasynyń (Illınoıs shtaty) Loyola University Medical Center medıtsınalyq ortalyǵynyń ıntensıvti terapııa bóliminde QR azamaty Talǵat Orymbaev qaıtys boldy.

Bul týraly QR SІM baspasóz qyzmeti habarlady.

T.Orymbaev 14 qyrkúıekten bastap, jergilikti joǵarǵy jyldamdyqty tas joldarynyń birinde BMV avtokóligin aıdaǵan 53 jasar AQSh azamaty Terrı Sems (Terri Sams) qaǵyp ketkennen keıin aýrýhanada bolǵan. T.Sems der kezinde jedel járdem qyzmetine qońyraý shalyp, otandasymyzǵa kerekti alǵashqy járdem kórsetken.

Dárigerlerdiń aıtýynsha, T.Orymbaevtyń alǵan jaraqattary aýyr bolǵandyqtan, onyń jaǵdaıynyń túzelýine esh múmkinshilik bolmaǵan. Qazaqstandyq azamat kóz jumǵan kezinde qasynda anasy Qarlyǵash Orymbaeva bolǵan.

T.Orymbaevtyń ata-anasy balasy qaıtys bolǵannan keıin denesin Qazaqstanǵa jetkizýde qolǵabys kórsetý týraly QR Syrtqy ister mınıstrligine ótinish bildirdi.

Qazirgi tańda Qazaqstannyń Amerıkadaǵy Elshiliginiń ókili Chıkago qalasyna baryp marqumnyń otbasyna kómek kórsetýde, sonyń ishinde T.Orymbaevtyń denesin Qazaqstanǵa jetkizý boıynsha qajetti uıymdastyrý is-sharalaryn atqarýda. Bul másele jerleý rásimderimen aınalysatyn amerıkandyq «Blair mozzarella funeral home» kompanııasymen birlese sheshilýde. Qazaqstandyqtyń denesin elge jetkizýge qatysty barlyq qarjylaı shyǵyndar Syrtqy ister mınıstrliginiń esebinen óteletin bolady.

T.Orymbaevtyń denesi shamamen 1 qazanda Nıý-Iork qalasy arqyly Astanaǵa jiberiledi dep josparlanýda.

Sonymen qatar, otandasymyzdyń qaıǵyly qaza tapqanyna AQSh-taǵy qazaqstandyq dıaspora ókilderi de beı-jaı qaramaǵanyn atap ótkimiz keledi. Olar T.Orymbaevtyń januıasyna 16 myń dollar shamasynda qarjy jınady.