QR SІM AQSh Memdepartamentiniń Astana protsesine qatysty synyna jaýap berdi
«Astana protsesi óz mandatyn tolyqtaı aqtap otyr dep esepteımiz. Birinshiden, Astana platformasynda qurylǵan Sırııadaǵy deeskalatsııa aımaǵy jergilikti jerlerdegi ahýaldy turaqtandyrý isinde óz tıimdiligin kórsetti. Úsh aımaq, atap aıtqanda Shyǵys Gýta, Hamsanyń soltústik aýdany, sonymen qatar Sırııanyń ońtústigi tolyqtaı beıbit ómirge oraldy. Qazirgi ýaqytta Idlıbtegi ahýaldy turaqtandyrý jumystary júrgizilip jatyr. Bul baǵytta kepilger elder tyǵyz ózara is-qımyldy jolǵa qoıǵan», - dedi QR Syrtqy ister mınıstrliginiń resmı ókili Aıbek Smadııarov.
Onyń aıtýynsha, ekinshiden, Astana protsesiniń bul jolǵy kezeńinde qarsylasýshy taraptardyń arasyndaǵy senim sharalaryn nyǵaıtýǵa, tutqyndardy almasýǵa basymdyq berdi. Máselen, Astana protsesiniń aıasynda ótken tutqyndardy almasý jáne iz-tússiz joǵalǵandardy izdeý jónindegi jumys tobynyń 6-shy otyrysy barysyndaǵy kelissózderde tutqyndardy almasýdyń jańa ýaǵdalastyǵynyń túrli nusqalary qaraldy.
«Úshinshiden, Sırııadaǵy bosqyndardyń qaýipsiz jáne óz erikterimen oralýy, turǵylyqty jerlerinde erkin qonys aýdarýlary úshin jaǵdaı jasaý jumystary júrgizilip jatyr. Al Konstıtýtsııalyq komıssııa qurý máselesine keler bolsaq, onda biz bul máseleniń Sırııadaǵy saıası protsess kezeńine qatysty ekendigin naqty túsinemiz. Bastapqyda Astana protsesiniń mindeti soǵys is-qımyldaryn toqtatý rejimin qamtamasyz etý boldy. Bul jumys aıaqtalýǵa jaqyn. Konstıtýtsııalyq komıssııany iske qosýdy qosa alǵanda, Sırııa problemasyn retteýdiń saıası aspektilerin talqylaý BUU qamqorlyǵymen ótetin Jenevadaǵy kelissózderdiń aıryqsha quziretine jatady»,- dedi Aıbek Smadııarov.
