QR Senatynyń tóraǵasy Sankt-Peterbýrgte birqatar ekijaqty kezdesý ótkizdi
SANKT-PETERBÝRG. QazAqparat - Parlament Senatynyń tóraǵasy Darıǵa Nazarbaeva Sankt-Peterbýrgtegi Tavrııa saraıynda birqatar ekijaqty kezdesý ótkizdi, dep habarlaıdy «QazAqparat» HAA-nyń menshikti tilshisi.
Ázerbaıjan Mıllı Medjlısiniń tóraǵasy Oktaı Sabıroǵly Asadovpen áńgime barysynda Kaspıı konventsııasyn ratıfıkatsııalaýdyń mańyzdylyǵy atap ótildi. D. Nazarbaevanyń pikirinshe, ol Kaspıımańy elderi arasyndaǵy saıası jáne ekonomıkalyq yntymaqtastyqty odan ári damytýǵa qýatty serpin beredi, sondaı-aq Kaspıı aımaǵyndaǵy turaqtylyq pen qaýipsizdikti nyǵaıtýǵa qyzmet etetin bolady. Taraptar talqylanatyn máselelerge qatysty kózqarastarynyń ortaqtyǵyn atap ótip, ózara is-qımyldyń barlyq salalaryndaǵy yntymaqtastyqty jalǵastyrýdy usyndy.
Qyrǵyz Respýblıkasy Jogorký Keneshiniń tóraǵasy Dastan Jumabekovpen kezdesý barysynda taraptar parlamentaralyq baılanystardyń mańyzdy bóligi bolyp tabylatyn ekijaqty qarym-qatynastardy odan ári tereńdetýdi qýattaıtynyn aıtty. Shekaramańy yntymaqtastyǵy, saýda-ekonomıkalyq ózara is-qımyldy, týrızmdi damytý máseleleri talqylandy. Qazaqstan Senatynyń basshysy osyǵan oraı «Ortalyq Azııa shengeni» óńirdiń týrıstik áleýetin keńeıtýge múmkindik beretinin atap ótti.
Armenııa Ulttyq Jınalysynyń tóraǵasy Ararat Mırzoıanmen ekijaqty yntymaqtastyqty nyǵaıtý máseleleri talqylandy. D.Nazarbaeva saýda-ekonomıkalyq áriptestikti keńeıtý úshin úkimetaralyq komıssııa qurýdy usyndy. Taraptar zań shyǵarý qyzmetinde tájirıbe almasý úshin parlamenttik dostyq toptarynyń áleýetin belsendi paıdalaný qajettigi týraly ortaq pikirge keldi.
Senat basshysy suhbattastaryn elimizdegi mańyzdy ishki saıası oqıǵalar týraly habardar etip, Qazaqstannyń qazirgi zamanǵy saıası júıesi bıliktiń, memlekettiń saıası jáne ekonomıkalyq damýynyń tolyq sabaqtastyǵyn qamtamasyz etetinin atap ótti. Qazaqstan Prezıdentiniń aldaǵy kezekten tys saılaýy týraly aıta kelip, «parlamentshiler zań shyǵarýshy bılik ókilderi retinde saılaý aldyndaǵy naýqandy zańnyń rýhy men árpine tolyq sáıkes ótkizýge, sondaı-aq saılaýdyń ádildigi men ashyqtyǵyn qamtamasyz etýge nıettenip otyrǵanyn» jetkizdi.
Avtor: Medet Ahmetov
