QR Senatyna depýtat saılaýdyń aldyn ala nátıjesi: Ulytaý oblysynan eki kandıdat jeńiske jetti

ULYTAÝ. QazAqparat - Ortalyq saılaý komıssııasy QR Parlamenti Senatynyń depýtattaryn saılaýda daýys berýdiń aldyn ala nátıjelerin jarııalady. Senatta Ulytaý oblysyn Serik Shaıdarov pen Sovetbek Medebaev tanystyrady, dep habarlaıdy QazAqaprat tilshisi.

Qazaqstanda senat depýtattaryn máslıhat depýtattary saılaıdy.

Kandıdattardyń taǵdyryn úsh jańa óńir boıynsha 346 máslıhat depýtaty sheshti.

Senatqa aldyn ala saılaýda Ulytaý oblysynan Qaraǵandy oblysy ákiminiń orynbasary Serik Shaıdarov pen Ulytaý aýdanynyń ákimi Sovetbek Medebaev jeńiske jetti.

Serik Shaıdarov 2020 jyly saılanǵan depýtattardyń ornyna kandıdattar arasynan 41 daýys jınap, alǵa shyqty. Al Sovetbek Medebaev 38 tańdaýshy daýysyn jınap, 2017 jyly saılanǵan depýtattardyń ornyna kandıdattar arasynda daýys berýde kósh bastap tur.

Konstıtýtsııaǵa saı, senat depýtattary alty jylǵa saılanady. Olardyń jartysy ár úsh jyl saıyn qaıta saılanady.

Esterińizge sala keteıik, shilde aıynda Memleket basshysy jańadan qurylǵan úsh oblystan senat depýtattaryn saılaýdy taǵaıyndady.