QR Senatorlary Sankt-Peterbýrgte Eýrazııalyq áıelder forýmyna qatysty

Forým barysynda Qazaqstan Respýblıkasynyń Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııanyń múshesi M.Bortnık «Qazaqstan halqy Assambleıasy - áleýmettik qaýipsizdik kepili» taqyryby boıynsha baıandama jasady. Senator ultaralyq jáne konfessııaaralyq kelisim ómirdegi shynaıy kóriniske aınalǵanyn, onyń qazaqstandyq úlgisi álemdik qoǵamdastyqtyń damý talaptaryna jaýap bere alatynyn atap ótti. Ol 2015 jyl Qazaqstan halqy Assambleıasy úshin mereıli jyl ekeni týraly habardar etti. «Assambleıa óz tarıhynda Qazaqstan Respýblıkasynyń Prezıdenti janyndaǵy konsýltatıvtik-keńesý organynan quqyqtyq negizi bar qoǵamdyq-saıası mártebege ıe konstıtýtsııalyq organǵa aınaldy», - dep atap ótti M.Bortnık.

M.Bortnık sondaı-aq Memleket basshysy N.Nazarbaevtyń Qazaqstan halqy Assambleıasynyń HHІІ sessııasynda alǵa qoıǵan, iske asyrýǵa Assambleıa tikeleı qatysatyn mindetterge nazar aýdardy. Bul búkil qazaqstandyq mádenıetti damytý, ortaq rýhanı-adamgershilik qundylyqtardyń negizinde halyq birligin nyǵaıtý, jastardy otanshyldyqqa tárbıeleý, memlekettik tildi jáne úsh tilde bilim berýdi odan ári damytý, ashyq memlekette qoǵamdyq baqylaýdy qamtamasyz etý, ultaralyq qatynastardy saıasılandyrýǵa jol bermeý, sondaı-aq Eýrazııalyq ekonomıkalyq odaq boıynsha mádenı-gýmanıtarlyq baılanystardy nyǵaıtý bolyp tabylady.