QR Saýda mınıstri Belarýspen aradaǵy kelisimsharttarǵa qatysty pikir bildirdi

NUR-SULTAN. QazAqparat – Saýda jáne ıntegratsııa mınıstri Baqyt Sultanov Belarýstegi jaǵdaıdy eskere otyryp, osy elmen aradaǵy saýda kelisimsharttarynyń talaptary oryndalatynyn aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda mınıstrden bıyl Belarýs pen Qazaqstan arasyndaǵy taýar aınalymynyń tómendeý múmkindigi týraly suraq qoıyldy.

«Boljam jasaý – negizinen jaqsy ataq ákelmeıdi. Saýda mınıstrliginiń róli kedergilerdi azaıtýǵa arnalǵan. Ekijaqty talqylaý alańynda, EAEO alańynda bizdiń kásipkerler úshin kedergilerdi azaıtý qadamdaryn iske asyramyz. Halyqaralyq jáne ishki saýdaǵa áser etetin faktorlar óte kóp. Ókinishke qaraı, ishki óńirlik saýda boıynsha kórsetkishter tıisti deńgeıde emes. Koronavırýs indetiniń áseri nátıjesinde bul kórsetkish tómendedi. Atap aıtqanda, faktorlar az emes. Degenmen de kelisimsharttardyń oryndalýyna qandaı da bir kedergiler bolmaıdy dep úmittenemiz», – dedi B. Sultanov.

Budan buryn habarlanǵandaı, álemdegi saýdanyń jalpylaı tejelýi turǵysynda Qazaqstannyń syrtqy saýda aınalymy birinshi jartyjyldyq qorytyndysy boıynsha 7,4 paıyzǵa tómendedi.