QR Prezıdenttiniń ókilettigin uzartý ulttyq múddeden týyndaǵan bastama - professor Saǵadı Bólekbaev
ALMATY. 6 qańtar. QazAqparat /Erlik Erjanuly/ - QR Prezıdentiniń ókilettigin uzartý jónindegi referendým ótkizý týraly bastama ishki-syrtqy múddelerdi bir arnaǵa toǵystyra alady. Bul pikirdi fılosofııa ǵylymdarynyń doktory Saǵadı Bólekbaev búgin Almatyda "Shyǵys-Batys dılemmasyndaǵy qazaqstandyq damý joly" dep atalatyn jańa kitaptyń tusaýkeserinde aıtty.
"Qandaı da bir sheshim qabyldaǵan kezde ulttyq jáne memlekettik múddeni basty nazarda ustaýymyz kerek. Óıtkeni sońǵy jyldary demokratııanyń kóshbasshysy sanalatyn Eýropa elderinde bolyp jatqan ártúrli jáıttar ondaǵy daǵdarysty aıqyn kórsetýde. Bul demokratııanyń áli qalyptasyp bolmaǵanynyń naqty aıǵaǵy. Sondyqtan biz óz qoǵamymyzdaǵy ekonomıkalyq, saıası reformalardyń arasyndaǵy baılanysty úzip almaýymyz kerek. Bul baǵyttaǵy óz jolymyzda batystyq demokratııa túsinigin halyqtyq múddeden joǵary qoımaýymyz qajet", - deıdi professor Saǵadı Baızaquly.
Onyń paıymdaýynsha, barlyq jaǵdaıda halyqtyń óz tańdaýyn jasaýyna múmkindik berý kerek. Ulttyq, memlekettik múddeni qorǵaý óte názik nárse. Onda "ógizdi de óltirmeıtin, arbany da syndyrmaıtyn" durys joldy tabý óte qıyn is. Qazir keıbir elderde oryn alyp jatqan túrli qarama-qaıshylyqtar ishki jáne syrtqy múddeniń toǵyspaýynan týyndap otyr.
