QR Prezıdenttiniń mádenıet ortalyǵy elorda jastary úshin «Ashyq esik kúnin» ótkizdi
ANA. Qazannyń 29-y. QazAqparat /Gúlmıra Álıakparova/ - Búgin Astanadaǵy Prezıdenttik mádenıet ortalyǵynda «Nur Otan» partııasynyń muryndyq bolýymen «Ashyq esik kúni» ótti,
dep habarlaıdy QazAqparat.
Prezıdenttik mádenıet ortalyǵynyń qyzmetkerlerinen quralǵan «Nur Otan» HDP-nyń bastaýysh partııalyq uıymy uıymdastyrǵan sharanyń basty maqsaty - elorda jastaryn elimizdegi irgeli, ári biregeı mádenıet ornymen, onda ornalastyrylǵan Qazaqstan halqynyń tarıhı-mádenı baılyqtaryn aıshyqtaıtyn qundylyqtarmen jáne kitaphana qorymen tanystyrý.
Stýdent jastardyń aldynda sóz alǵan Ortalyqtyń dırektory Myrzataı Joldasbekov, Elbasy N.Nazarbaevtyń syzba jobasymen salynǵan Mádenıet ortalyǵy saltanatty túrde 2000 jyly ashylǵanyn jetkizip, aldaǵy ýaqytta mundaı el táýelsizdiginiń alǵashqy jyldary atqarylǵan ıgilikti isterdiń barlyǵyn halyqqa kórsetý úshin murajaıdyń basqa salasyn qalyptastyrý kózdelip otyrǵandyǵyn jetkizdi.
Mádenıet ortalyǵy úsh saladan - 700 myńnan astam kitap qory bar kitaphanadan, kontserttik zal jáne 11 zalǵa bólingen murajaıdan turady.
Murajaıdyń «Táýelsiz Qazaqstan Respýblıkasynyń negizin qalaýshy N.Nazarbaev» zalynan egemendik jyldary qabyldanǵan mańyzdy qujattardy jáne shet memleket basshylarynyń Elbasyna tartý etken jalpy sany 250 kádeni kórýge bolady. Sondaı-aq Ortalyqta Imanǵalı Tasmaǵambetovtyń jeke toptamasynan alynǵan 1 myń 500-den astam zergerlik buıym qoıylǵan zal, kóshpendiler órkenıetine, etnografııaǵa jáne taǵy basqa da taqyryptarǵa arnalǵan zaldar jumys isteıdi.
