QR Prezıdenttine kandıdattardyń alǵashqysy memlekettik tilden synaq tapsyrýda
Kandıdat qazirgi ýaqytta lıgvıstıkalyq komıssııa usynǵan taqyryptardyń ishinen «Álemdik daǵdarys jáne Qazaqstan ekonomıkasy» taqyrybyna kólemi 2 betten aspaıtyn jazbasha jumysyn jazý ústinde.
QR Prezıdenttigine kandıdattardy memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy Myrzataı Joldasbekovtiń tanystyrýynsha, kandıdat 1959 jyldyń 31 qańtarynda Jambyl oblysynyń Jambyl aýdanyna qarasty Qyzyljuldyz aýylynda dúnıege kelgen. Qazaqstan azamaty. Ulty - qazaq. Bilimi joǵary.
«Asqar Jorabaıuly, siz synaqtyń úsh deńgeıinen ótesiz. Birinshi, jazba jumysyn jazasyz. Biz usynǵan taqyryptyń ishinen bireýin tańdaısyz da bir saǵat shyǵarma, esse jazasyz. Bir saǵat jetpeı jatsa, taǵy jarty saǵat ýaqyt qosa alamyz. Osy bir jarym saǵat ishinde eki paraq jazba jumysyn ótkizýińiz kerek. Ekinshi kezeńde aldyn ala bekitken qazaq ádebıetindegi betke ustar avtorlardyń shyǵarmalarynan tańdaý jasaısyz. Komıssııa múshesi sol siz tańdaǵan kitaptan úsh baspa tabaq tańdaıdy. Úsh baspa tabaqtyń deńgeıinde tańdalǵan shyǵarmany oqyp beresiz. Barynsha kórkem, yrǵaqty oqyǵanyńyz durys bolady. Úshinshi synaq - erkin taqyryp. Erkin taqyryptyń bireýin tańdaǵannan keıin taǵy bir saǵat ýaqyt beriledi. Bir saǵat daıyndalǵannan keıin komıssııanyń aldynda on bes mınýt sol tóńireginde erkin sóılep beresiz. Osy synaqtar bitkennen keıin komıssııa jeke bólmege talqylaýǵa ketip, Sizge baǵa beremiz", - dedi M.Joldasbekov.