QR Prezıdenttik mádenıet ortalyǵynda «Armysyń, áz-Naýryz!» atty merekelik shara ótedi

«Ulystyń uly kúni - Naýryz meıramy bıyldan bastap túrk, parsy jáne kavkaz halyqtarynda ǵana emes, 200-ge tarta el uıysqan Birikken Ulttar Uıymynyń kóleminde dúbirletip atalyp ótpek. BUU Bas Assambleıasy «Halyqaralyq Naýryz meıramy» qararyn biraýyzdan qabyldap, naýryzdyń 21 - shi kúnin álemdik mereke retinde belgiledi. Osyǵan oraı, Naýryz meıramy qarsańynda kópshiliktiń mereıin asyryp, ulttyq qundylyqtardy ulyqtaıtyn sharalardy qolǵa alatyn QR Prezıdenttik mádenıet ortalyǵy bul joly da óziniń turaqty mádenı is-sharalaryn uıymdastyryp otyr», delingen baspasóz habarlamasynda.

Іs-sharanyń maqsaty - jyl basy dep sanalatyn, tarıhy tereńde jatqan eń kóne shyǵys halyqtaryna tán ulttyq merekeni Elorda turǵyndary men qonaqtaryna keńinen nasıhattaý jáne qazaq halqynyń mádenıeti men ónerin, ádet-ǵuryp, salt-dástúrin kórsetý arqyly rýhanı-estetıkalyq mádenıetti arttyrý jáne merekelik kóńil-kúı syılaý.

Baspasóz qyzmetiniń habarlaýynsha, «Armysyń, áz-Naýryz!» atty merekelik shara Ortalyqtyń kórme zalynda saǵat 10.00-de ulttyq dúnıetanymǵa qatysty murajaılyq qundylyqtardyń negizinde jasalǵan kádesyı ónimderiniń kórme-jármeńkesiniń tusaýkeserin ashýmen bastalady. Kórme-jármeńkege zergerlik ónerdiń sheberi Berik Álibaıdyń qolynan shyqqan barlyq zergerlik ónimderi - áshekeı buıymdary, átirge arnalǵan saýyt, shaqsha, er adamnyń beldigi, qylysh, kúmisten jasalǵan at ábzelderi qoıylady. Málik Ábdildınniń de keramıka men farfordan jasalǵan kádesyı ónimderiniń 15-ten asa túri - jazý quraldaryna arnalǵan úıkek, qumyralar, dastarqan jabdyqtary, túrli logotıptegi kádesyı tabaqtary da kórmeden oryn teppek. Sondaı-aq munda QR Sýretshiler odaǵynyń múshesi Nurjan Qarymsaqovtyń «Saqtar shaıqasy», «Samuryq» sııaqty tarıhı taqyryptaǵy tól týyndylary bar.

«Halyq nazaryna usynylyp otyrǵan kádesyı ónimderiniń kórme-jármeńkesin tamashalaǵan halyq túrik eliniń dástúrli saz óneri sheberleriniń - Túrkııadan arnaıy shaqyrylǵan Gınnestiń rekordtar kitabyna engen óner qaıratkeri Ferhat Dýrmýsh bastaǵan mádenıet ókilderiniń ónerin tamashalaıdy. Túrik eliniń dástúrli saz óneri sheberleriniń baǵdarlamasy aıaqtalǵan soń, kontsert Ulttyq dástúrler teatrynyń naýryz meıramyna daıyndaǵan teatrlandyrylǵan kontserttik baǵdarlamasymen jalǵasady. Kesh sońynda kelgen qonaqtar ortalyq qyzmetkerlerimen birge «Qara jorǵa» bıin bıleıdi. Ortalyq dırektorynyń tapsyrmasymen ujymnyń barlyq qyzmetkerleri bul bıge, bir aı boıy kúndelikti 15 mınýttyq jumys ýaqytyndaǵy jattyǵý retinde bılep daıyndalýda», dep naqtylaı túsken baspasóz qyzmeti.

Merekelik keshtiń sońynda jıylǵan halyq arnaıy daıyndalǵan naýryz kójeden dám tatady. Merekelik is-sharaǵa qoǵam qaıratkerleri, depýtattar, elordalyqtar men qala qonaqtary, BAQ ókilderi shaqyrylyp otyr.