QR Prezıdenttik mádenıet ortalyǵy tabıǵat apatynan zardap shekken otandastarymyzǵa gýmanıtarlyq kómek aktsııasyn uıymdastyrdy
ASTANA. Sáýirdiń 2-si. QazAqparat - Búgin QR Prezıdenttik mádenıet ortalyǵynda tabıǵat apatynan zardap shekken otandastarymyzǵa kómek kórsetý maqsatynda gýmanıtarlyq kómek aktsııasy uıymdastyryldy,
dep habarlady atalǵan ortalyqtyń baspasóz qyzmetinen.
Belgili memleket jáne qoǵam qaıratkeri, QR Prezıdenttik mádenıet ortalyǵynyń dırektory Myrzataı Joldasbekovtyń bastamasymen aktsııaǵa ortalyq qyzmetkerleri men BAQ ókilderi, qoǵam qaıratkerleri qatysty. Olardyń arasynda «Mádenı mura» jýrnalynyń bas redaktory Dúkenbaı Dosjan, «Altyn tamyr» jýrnalynyń bas redaktory Nesipbek Aıtuly, tabıǵat apattarynan zardap shekken turǵyndarǵa qaıyrymdylyq kómek beretin «Aqsýatty qoldaý» qorynyń tóraǵasy Muhtarbek Ámirhanov bar.
Óz sózinde belgili memleket jáne qoǵam qaıratkeri M.Joldasbekov tilsiz jaýdyń aıtyp kelmeıtinin aıtyp, «baýyrlarymyzdyń basyndaǵy jaǵdaıǵa qabyrǵamyz qaıysty, endi bolǵan iske berik bolyp, «kóp bop kótergen júk jeńil» degendeı, qoldan kelgenshe kómegimizdi kórsetip, aıanbaýymyz kerek», dedi óz sózinde. Sondaı-aq ol Abaı, Shákárim, Muhtardaı alyptardyń dúnıege kelgen jerin sý apaty alyp jatqany janyna batqanyn, osyndaı eldiń basyna kún týǵan kezdegi paıdany oılap, qulqynyn toltyrmaqqa umtylǵan arsyzdardyń isin de aıyptady. Osyndaı sharalarda qaltaly azamattardyń belsendi bolýy kerektigin de basa aıtty.
«Shyǵys Qazaqstanda oryn alǵan tabıǵat apatynan zardap shekken turǵyndarǵa kómek kórsetý maqsatynda QR Prezıdenttik mádenıet ortalyǵynyń ujymy 1 jáne 5 kúndik aralyǵyndaǵy jalaqysyn qolma-qol jınap tapsyryp otyr. Bul jınalǵan qarjyny kómekke zárý turǵyndarǵa jiberý kózdelgen. Qarjylaı kómekpen qatar qajetti jyly kıim-keshek te jınalý ústinde», delingen baspasóz habarlamasynda.
Qazirgi kezde 600 myń teńgege jýyq qarjy jınalǵan. Aıta keteıik, osyǵan deıin de bul ujymnyń qyzmetkerleri Qyzylaǵash aýylyndaǵy sý tasqyny saldarynan zardap shekken turǵyndarǵa da bir kúndik jalaqylaryn arnaıy ashylǵan esepshotqa aýdarǵan bolatyn. QR Prezıdenttik mádenıet ortalyǵy bıýdjettik sala bolǵandyqtan qyzmetkerleriniń alatyn jalaqysy az, degenmen olar kómek qolyn sozyp, ózgelerdi de osyǵan úndep otyr. Búginde Qazaqstannyń eki óńirinde oryn alǵan oqıǵaǵa baılanysty ortalyqtyń qyzmetkerleri arasynda jınalǵan qarjylaı kómektiń kólemi 1.200 000 teńgeni quraıdy.
«Qasıetti jumadaǵy bul is zeket bergendeı bolady», dep atap ótken qor tóraǵasy Muhtarbek Ámirhanov aktsııaǵa qatysýshylar men ortaq iske jumyla kirisken ortalyqtyń ujymyna alǵysyn bildirdi.
