QR Prezıdenttiginen úmitker Ǵanı Qasymov «Nevada-Semeı» qozǵalysynyń ókilderimen kezdesti

Kezdesýge «Radıatsııa.Ekologııa.Densaýlyq» komıtetiniń tóraǵasy Vıktor Inıýshın, medıtsına ǵylymynyń doktory Maıra Jangelova, Halyqaralyq «Nevada-Semeı» qozǵalysynyń vıtse-prezıdenti Haron Dadaev, osy uıymnyń ókili Rústem Tursymbaev, Halyqaralyq «Nevada-Semeı» qozǵalysynyń atqarýshy dırektory Ivan Lıtvınov, sondaı-aq, atalmysh uıymnyń ǵylymı hatshysy Lıýdmıla Prýs qatysty.

Jıyn barysynda Japonııa eliniń jaǵdaıy sóz boldy. «Radıatsııa.Ekologııa.Densaýlyq» komıtetiniń tóraǵasy Vıktor Inıýshınniń aıtýynsha, japon jerinde bolyp jatqan jaǵdaı bárimizdi alańdatyp otyr. "Jer sharyndaǵy barlyǵymyz bir kemede otyrmyz. Sol sebepti, ol jaqta oryn alyp otyrǵan bul jaǵdaıǵa beı -jaı qaramaýymyz kerek. Qazaqstan aýmaǵy tehnogendik apattar oryn alýy múmkin aımaqtardyń biri. Sol sebepti, bizder qolymyzdan keletin jaǵdaılardy jasaýymyz kerek. Mysaly, sý tasqyndarynyń aldyn alýǵa bolatyn bógetterdiń jaǵdaılaryn baqylap otyrýymyz kerek. Taýly aımaqta ornalasqan turǵyndardy sel qaýpinen saqtaný sharalaryn eskertip, kómek kórsetip, kerek bolsa qaýipsiz jerlerge kóshirý kerek»,-deıdi ol.

- Ár túrli tosyn oqıǵalarǵa bizdiń qutqarý qyzmetterimiz daıyn bolýy kerek, -dedi Ǵanı Qasymov. -Jedel járdem qyzmeti de soǵan saı bolýy tıis. Bul - birinshi kezekte turatyn másele bolýy kerek.

Sondaı-aq jıynǵa qatysýshylar atom energetıkasy tóńireginde birqatar oı-pikirlerimen bólisti. "Bolashaqta da atalmysh uıymmen tyǵyz baılanys ornatyp, alǵa tartylǵan máselelerdi qarap, ony sheshý joldaryn da oılastyramyz", - dedi Ǵanı Qasymov.