QR Prezıdenttigine úmitkerlerdiń sońǵy ári naqty tizimi 24 aqpan kúni jarııalanady - OSK tóraǵasy
ASTANA. 21 aqpan. QazAqparat /Asqar Bımendın/ - Jeksenbi, 20 aqpan kúni tún ortasynda QR Prezıdenttigine kandıdattyqqa úmitkerlerden qujat qabyldaý aıaqtaldy, barlyǵy 22 adam qujat tapsyrsa, onyń ishinde 4 áıel adam bar.
Bul týraly QR Prezıdentiniń kezekten tys saılaýyn ótkizý men daıyndyq jumystaryn uıymdastyrý máseleleri jóninde ótken búgingi respýblıkalyq semınar-keńes barysynda Ortalyq saılaý komıssııasynyń tóraǵasy Qýandyq Turǵanqulov málim etti.
Tóraǵanyń aıtýynsha, QR Prezıdenttigine kandıdat 22 úmitkerden, sonyń ishinde saıası partııalar usynǵan - úsh, qoǵamdyq birlestikter usynǵan - bir, ózin-ózi usyný tártibimen on jeti adamnan qujat qabyldandy.
Onyń aıtýynsha, Ortalyq saılaý komıssııasy 25 aqpanǵa deıin úmitkerlerdiń Konstıtýtsııa normalary men QR-daǵy saılaý zańnamasyna sáıkes keletindigin anyqtaýdy, qol qoıý paraqshalaryn tekserýdi aıaqtap, prezıdenttikke úmitkerlikti jalǵastyratyn adamdardyń sanyn jarııa etýi kerek. «24 aqpan kúni biz prezıdenttikke úmitkerler jaıly aqparat beretin bolamyz», - dedi QR Ortalyq saılaý komıssııasynyń tóraǵasy.
Sonymen qatar, usynylǵan kandıdattardy tirkeý 2011 jyldyń 2 naýryzy kúni aıaqtalýy tıis.
Esterińizge sala keteıik, esep boıynsha QR Prezıdenttigine úmitker 22-kandıdat bolyp Almatynyń 58 jastaǵy kásipkeri, munaıgaz salasynyń konsýltanty Serik Saparǵalıevtyń esimi tizimdeldi.
