QR Prezıdenttigine úmitkerlerdi usyný aıaqtaldy

ASTANA. QazAqparat - 18 naýryzǵa deıin QR Prezıdenttigine úmitkerlerdiń memlekettik tildi erkin meńgergendigin anyqtaý jónindegi komıssııa jumys isteıdi. Bul týraly búgin QR Ortalyq saılaý komıssııasynyń hatshysy Baqyt Meldeshev málim etti.

16 naýryzǵa qaraǵan túngi saǵat 00-01-de Ortalyq saılaý komıssııasyna 27 ótinish tirkelgenin atap ótken ol: «Erteń biz qoldaǵy barlyq materıaldary óńdeımiz de qansha adamnyń shyǵyp qalǵanyn málim etemiz. Qazirgi ýaqytta bizdiń qolymyzda saıası naýqannan bas tartý materıaldary, emtıhanǵa kelmeı qalǵan úmitkerler bar. 18 naýryzǵa deıin lıngvıstıkalyq komıssııa jumys isteıtin bolady. Biz kestesin jasadyq. Odan ary qalaı órbıtinin kóremiz», - dedi ol.

Aıta keteıik, osy sátke deıin 27 azamat prezıdenttikke úmitker retinde usynyldy. Olardyń ekeýin saıası partııalar usynsa, 25-i ózin-ózi usynyp otyr. Osy 27 adamnyń ishinde 10 adamǵa prezıdenttikke úmitker retinde tirkeýden bas tartyldy. Olardyń ishinde 2 adam jasy 40-qa tolmaýyna jáne 8 adam lıngvıstıkalyq komıssııa synynan óte almaýyna baılanysty tirkelmedi. Úsh úmitker lıngvıstıkalyq komıssııanyń emtıhanyna kelmedi jáne bir adam óziniń ótinishin qaıtyp aldy. 5 úmitker lıngvıstıkalyq komıssııadan, basqa da tekserýlerden ótip, QR Konstıtýtsııasy men «Saılaý týraly» zańyna sáıkes dep tanyldy. Onyń ishinde N.Nazarbaev kandıdat retinde tirkeldi.