QR Prezıdenttigine kandıdatty qoldaıtyn qoldardyń rastyǵyn saılaý komıssııalarynyń tekserý merzimi qysqartyldy
ASTANA.QazAqparat - QR Ortalyq saılaý komıssııasy Qazaqstan Respýblıkasy Prezıdentiniń kezekten tys saılaýynda Qazaqstan Respýblıkasynyń Prezıdenttigine kandıdatty qoldap qol qoıý paraqtaryn berýdiń jáne qoldardyń rastyǵyn tekserýdiń merzimderin qysqartý týraly qaýlyǵa qol qoıdy.
QazAqparat qaýly mátinin jarııalaıdy.
Qazaqstan Respýblıkasy Ortalyq saılaý komıssııasynyń qaýlysy №6/266
2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýynda Qazaqstan Respýblıkasynyń Prezıdenttigine kandıdatty qoldap qol qoıý paraqtaryn berýdiń jáne qoldardyń rastyǵyn tekserýdiń merzimderin qysqartý týraly
«Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi Konstıtýtsııalyq zańy 12-babynyń 2) tarmaqshasyna, 14-babynyń 2) tarmaqshasyna, 56 jáne 66-1-baptaryna sáıkes Qazaqstan Respýblıkasy Ortalyq saılaý komıssııasy qaýly etedi:
1. Qazaqstan Respýblıkasynyń Prezıdenttigine kandıdatty qoldap qol jınaýǵa arnalǵan qol qoıý paraqtary onyń Qazaqstan Respýblıkasynyń Konstıtýtsııasynda jáne «Qazaqstan Respýblıkasyndaǵy saılaý týraly» 1995 jylǵy 28 qyrkúıektegi Konstıtýtsııalyq zańynda belgilengen talaptarǵa sáıkestigi tekserilgennen keıin eki kúntizbelik kúnniń ishinde beriletin bolyp belgilensin.
2. Qazaqstan Respýblıkasynyń Prezıdenttigine kandıdatty qoldaıtyn qoldardyń rastyǵyn aýmaqtyq saılaý komıssııalarynyń tekserý merzimi onnan bes kúntizbelik kúnge deıin qysqartylsyn.
3. Osy qaýly oblystyq, Astana jáne Almaty qalalyq saılaý komıssııalaryna jiberilsin.
4. Osy qaýly buqaralyq aqparat quraldarynda jarııalansyn.
Tóraǵa Q.Turǵanqulov
Hatshy B.Meldeshov
