QR Prezıdenttigine kandıdattardyń saılaý aldy úgit-nasıhat jumystary 3 naýryzda bastalatyn boldy
ASTANA. 4 aqpan. QazAqparat /Aıdar Ospanalıev/ - Qazaqstan Respýblıkasy Prezıdenttigine kandıdattardyń saılaý aldy úgit-nasıhat jumystary 3 naýryzda bastalatyn boldy. Bul týraly búgin Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov málim etti.
Onyń sózine qaraǵanda, saılaý aldy úgit-nasıhat jumystary 1 sáýir kúni saǵat 24.00-de aıaqtalady. Daýys beretin kúnniń aldyndaǵy kúni jáne daýys beretin kúni úgit júrgizýge tyıym salynǵan. Sheteldikterdiń, azamattyǵy joq adamdardyń, sheteldik zańdy tulǵalardyń jáne halyqaralyq uıymdardyń saılaýda belgili bir nátıjege qol jetkizýge kedergi bolatyn nemese demep jiberetin qyzmetti júzege asyrýyna tyıym salynady.
Prezıdent saılaýy respýblıkalyq bıýdjetten qarjylandyrylady. Kandıdattardyń buqaralyq saılaý aldy sharalaryn ótkizýge jáne kandıdattardyń saılaý zańnamasymen kózdelgen úgit materıaldaryn shyǵarýǵa baılanysty shyǵyndardy, sondaı-aq kandıdattardyń kóliktik shyǵyndary Ortalyq saılaý komıssııasy belgilegen mólsherde bıýdjet qarajaty esebinen óteledi.
Bıýdjetten bólingen qarajatqa aımaqtyq saılaý komıssııalary ıelik etedi jáne onyń maqsatty paıdalanylýy úshin jaýapkershilik alady. Úgit naýqany júrgizilýi úshin prezıdenttikke kandıdattar saılaý qorlaryn qurýǵa quqyly. Prezıdenttikke kandıdattyń saılaý qorynyń shekti mólsheri 431 mln. 973 myń teńgeni quraıdy. Bul qorlardyń qarajat kózderine jáne jumsalýyna zańnamaǵa sáıkes qarjylyq monıtorıng júrgiziledi.
