QR Prezıdenttigine kandıdat M.Eleýsizov EUÝ stýdentterimen kezdesti
ASTANA. 15 naýryz. QazAqparat - Búgin QR Prezıdenttigine kandıdat Mels Eleýsizov L.Gýmılev atyndaǵy Eýrazııa ulttyq ýnıversıtetiniń stýdentterimen kezdesip, olardyń saýaldaryna jaýap berdi.
Kezdesý barysynda ol óziniń saılaýaldy tuǵyrnamasy týraly keńinen áńgimelep berdi. M.Eleýsizovtiń atap ótýinshe, baǵdarlamasynda ekologııa máselesine basa nazar aýdarylǵan. Óıtkeni qazirgi tańdaǵy negizgi ekologııalyq problemalardyń biri klımattyń jahandyq jylynýy bolyp otyr. «Qazir klımattyń ózgerýi boıynsha óte qaýipti protsester júrýde. Jer temperatýrasy 0,5 gradýsqa kóterildi. Klımattyń jylyný problemasy - atom soǵysynan da qorqynyshty óte qaýipti jaǵdaı», - dedi Prezıdenttikke kandıdat.
Sondaı-aq ol óziniń saılaýǵa barlyq qoǵamnyń, onyń ishinde bılik basyndaǵylardyń nazaryn klımattyń jylynýy problemasyna aýdartý maqsatynda túskendigin basa aıtty.
