QR Prezıdenttigine kandıdat L. Qoıshıeva memlekettik tildi erkin meńgergen - QR OSK
OSK baspasóz qyzmetiniń habarlaýynsha, bolǵan emtıhannyń nátıjeleri boıynsha lıngvıstıkalyq komıssııa ashyq daýys berý arqyly kópshilik daýyspen Qazaqstan Respýblıkasynyń Prezıdenttigine kandıdat Lımana Qoıshıevanyń memlekettik tildi erkin meńgergeni týraly sheshim qabyldady.
Qorytyndy sheshimdi jarııalaı otyryp, Qazaqstan Respýblıkasynyń Prezıdenttigine kandıdattyń memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy Myrzataı Joldasbekov: «Búgin Prezıdenttikke kandıdat Lımana Qoıshıeva memlekettik tildi erkin meńgergendigin anyqtaý rásiminen ótti. Onyń tapsyrmalary mynadaı: «Qazaq halqynyń rýhanı qundylyqtary» degen taqyrypta shyǵarma jazý, sodan keıin Abaıdyń «Qara sózderi» ádebı eńbeginen kórkem mátindi oqý jáne sońǵy tapsyrma - «Álem jáne beıbitshilik» degen taqyrypta erkin áńgimelesý boldy. Tapsyrmalardy kandıdat jaqsy deńgeıde oryndady. Biz Lımana Qoıshıeva memlekettik tildi erkin meńgergen degen qorytyndyǵa keldik»,- dep atap kórsetti. Sheshim lıngvıstıkalyq komıssııanyń 2015 jylǵy 6 naýryzdaǵy № 4 hattamasymen resimdeldi. Otyrysqa Qazaqstan Respýblıkasy Ortalyq saılaý komıssııasynyń múshesi Lázzat Súleımen qatysty.
