QR Prezıdenttigine kandıdat Ǵ. Qasymov órt sóndirý bóliminiń qyzmetkerlerimen kezdesti
ALMATY. 14 naýryz. QazAqparat /Názıra Eleýhan/ - Búgin Almatyda QR Prezıdenttigine kandıdat, Parlament Senatynyń depýtaty Ǵanı Qasymov óziniń saılaý aldy naýqany aıasynda Bostandyq aýdanyndaǵy órt sóndirý bóliminiń qyzmetkerlerimen kezdesti.
Ǵanı Qasymov kezdesýde mekeme qyzmetkerlerin saılaý aldy baǵdarlamasymen tanystyryp, órt sóndirý qyzmetiniń jumysymen, ondaǵy máselelermen tanysty.
Onyń aıtýynsha, elimizdiń órt sóndirý stansalaryna laıyqty kóńil bólinip otyrǵan joq. Bólimdi qarap, tanysyp shyqqan kandıdat: «Órt sóndirý oryndary qajetti qural-jabdyqtarmen jetkilikti jabdyqtalmaǵan, kólikter de jetkiliksiz, mamandar sanyn kóbeıtý qajet, jalaqylaryn ósirip, úı-jaı máselelerin de sheshý kerek. Mundaǵy 4 kólik óte az, 8 órt sóndirý kóligin alý qajet. Keshe ózderińiz bilesizder, eń joǵary tehnologııaly el Japonııa apatqa tótep bere almady. Al, Almaty seısmoqaýipti jer ekenin eskersek, biz árqashan tótenshe jaǵdaılarǵa daıyn bolýymyz kerek. Sondyqtan, órt sóndirý stansylarynyń jaǵdaılaryna erekshe nazar aýdarýymyz qajet», - dedi.
