QR Prezıdenttigine eks-kandıdat Jaqsybaı Bázilbaev taǵy da saılaýǵa qatysý úshin OSK-ge ótinish berdi

«Qalyń kópshilik bul azamatty tanıdy. Ol osyǵan deıin bolǵan Prezıdenttik saılaýlarǵa da qatysqan bolatyn. Osymen Jaqsylyq Bázilbaev Prezıdenttik saılaýǵa qatysý úshin úshinshi ret ótinish berip otyr. Osyǵan deıingi kezekti eki saılaýda ol óziniń kandıdatýrasyn alyp tastaǵan bolatyn», - dedi OSK hatshysy Baqyt Meldeshev.

Esterińizge sala keteıik, bul Ortalyq saılaý komıssııasyna kezekten tys Prezıdent saılaýyna qatysý úshin ótinish berip otyrǵan 17-shi azamat.

Osylaısha kezekten tys Prezıdenttik saılaýǵa túsýge úmitker adamdardyń sany - 12 adamdy qurap otyr. Saılaýǵa tek eki azamat qana saıası partııalardyń atynan túsýge nıettenip otyr. Olar - kandıdatýrasyn «Nur Otan» halyqtyq demokratııalyq partııasy usynǵan qazirgi Memleket basshysy Nursultan Nazarbaev pen Qazaqstannyń Kommýnıstik halyqtyq partııasy usynǵan partııa hatshysy Jambyl Ahmetbekov. Búgin Ortalyq saılaý komıssııasy Memleket basshysy Nursultan Nazarbaevty 3 sáýirde ótetin kezekten tys Prezıdenttik saılaýǵa kandıdat retinde tirkedi.

Taǵy eskerte ketetin másele, OSK-ǵa ótinish bergen 17 azamattyń ekeýi, atap aıtqanda «Kenesary han» qoǵamdyq qorynyń prezıdenti Ýálıhan Qaısarov pen ýaqytsha jumyssyz Qanat Esjanov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan óte almady. Osy sebepti Ortalyq saılaý komıssııasy atalmysh úmitkerlerdi tirkeýden bas tartyp, tıisti qaýly qabyldady. Sondaı-aq taǵy bir úmitker Bastıon-Ast» kúzet agenttigi» JShS-nyń kúzetshisi 48 jastaǵy Tolybaı Baımýrzın lıngvıstıkalyq komıssııanyń synyna óte almady.

Sondaı-aq Prezıdent saılaýyna qatysatyndyǵyn bildirip OSK-ǵa ótinish bergen pavlodarlyq zeınetker Záýre Masına men Pavlodar oblysynyń 55 jastaǵy turǵyny Sovetqazy Nursıla ótinishterin qaıtaryp aldy.