QR Prezıdenttigine 4 úmitkerdiń respýblıkalyq shtab jetekshileri "AıtPark" pikirtalas klýbynyń basty qonaqtary boldy
ALMATY. 29 naýryz. QazAqparat /Názıra Eleýhan/ - Búgin Almatydaǵy Ulttyq kitaphanada "AıtPark" pikirtalas klýbynyń kezekti otyrysy bolyp ótti.
Elimiz úshin mańyzdy bolyp tabylatyn shara - 3 sáýir kúni kezekten tys Prezıdent saılaýynyń ótetindigine oraı, bul joly QR Prezıdenttigine 4 úmitkerdiń respýblıkalyq shtab jetekshileri klýbtyń basty qonaqtary boldy.Otyrysty klýbtyń jetekshisi Nurlan Erimbetov júrgizdi. Klýbtyń qonaqtary AıtParktiń suraqtaryna jaýap berdi. Negizgi áńgime saılaý tóńireginde órbidi.
Shtab jetekshileri ózderiniń saılaýaldy naýqanyndaǵy atqarylǵan is-sharalarmen bólisip, úmitkerlerdiń baǵdarlamalarymen tanystyrdy.
«QR Prezıdenttigine úmitker Mels Eleýsizov elimizdiń batys óńirinen basqa barlyq jerinde boldy. Nasıhat jumysyna sheteldik keńesshiler tartylǵan joq, degenmen, saılaýaldy is-sharalar óz deńgeıinde júrgizildi. Bizdiń eń basty maqsatymyz ekologııany jaqsartý, árıne, birinshi orynda halyqtyń jaǵdaıy turady»,-dedi QR Prezıdenttigine úmitker Mels Eleýsizovtyń respýblıkalyq shtab jetekshisi Nurjan Oshanbekov.
N.Nazarbaevty qoldaý jónindegi Almaty qalalyq shtab jetekshisi, ekonomıka ǵylymdarynyń doktory, professor Rahman Alshanov otyrys barysynda Nursultan Nazarbaevtyń eń kóp daýys jınaıtyndyǵyna senim bildirdi. «Halyq durys tańdaý jasaıdy dep senemin. Bizdiń baǵdarlamamyz aıqyn da, jarqyn. Bizdiń kandıdatymyzdyń basty maqsattarynyń biri - 2020 jylǵa deıin, maqsatty ekonomıkadan ketý, ınnovatsııalyq damýdy arttyrý, aýyldy jerlerge taza sý jetkizý, áleýmettik salada jalaqyny kóterý, ultaralyq kelisim saıasatyn ary qaraı jalǵastyrý, sonymen qatar, halyqaralyq qatynastar salasynda el bedelin odan ári kóterý bolyp tabylady»,-dep atap ótti ol.
«Eger bizdiń úmitker saılaýda jeńip shyǵatyn bolsa, halyqtyń jaǵdaıy jaqsarady, eń aldymen áıelder qaýymyna kóńil bólinetin bolady. Áıelder 55 jasynda zeınetkerlikke shyǵady»,-dedi QR Prezıdenttigine Patrıottar partııasynan úmitker Ǵanı Qasymovtyń respýblıkalyq shtab jetekshisi Gúldana Nurpeıisova.
Al, QR Prezıdenttigine Qazaqstan Komýnıstik halyqtyq partııasy atynan úmitker Jambyl Ahmetbekovtyń respýblıkalyq shtab jetekshisiniń orynbasary Aleksandr Holotkov óz kandıdatyna qarpaıym jumysshylar men jastar daýys beretinine senim bildirdi.
Otyrys sońynda klýb qonaqtary prezıdenttik saılaýdyń ádil ótetinine senimderin bildirip, barsha qaýymdy daýys berýge shaqyrdy.
