Prezıdent Teleradıokesheni men koreıalyq Aju News Corporation Azııa keńistiginde biryńǵaı medıajeli qurýǵa kiristi
ASTANA. KAZINFORM - Qazaqstan Respýblıkasynyń Prezıdenti Qasym-Jomart Toqaevtyń Koreıa Respýblıkasyna memlekettik sapary aıasynda QR Prezıdentiniń Teleradıokesheni men Ońtústik Koreıanyń Aju News Corporation iri mýltımedııalyq jáne baspa kompanııasy yntymaqtastyq jáne ózara túsinistik týraly memorandýmǵa qol qoıdy.
Qujatqa QR Prezıdenti Teleradıokesheniniń dırektory Raýshan Qajybaeva men Aju News Corporation kompanııasynyń tóraǵasy ári negizin qalaýshy Kvak En Gıl qol qoıdy.
Kelisim aıasynda taraptar medıa qurylymdar arasyndaǵy kásibı baılanysty damytýǵa, aqparat almasýdy keńeıtýge, televızııa, tsıfrlyq medıa jáne mýltımedııalyq kontent salasynda birlesken jobalar jasaýǵa nıetti.
Raýshan Qajybaevanyń aıtýynsha, Teleradıokeshen bul yntymaqtastyqty sapaly halyqaralyq medıa dıalogty damytýǵa baǵyttalǵan uzaq merzimdi ınvestıtsııa retinde qarastyrady.
– Bizdiń seriktestigimizdiń basty baǵyty – qazaqstandyq jáne koreıalyq keń aýdıtorııaǵa qyzyqty kontent óndirýdiń zamanaýı tásilderimen almasý, – dedi QR Prezıdenti Teleradıokesheniniń dırektory.
Kvak En Gıldiń aıtýynsha, buqaralyq aqparat quraldary Qazaqstan men Koreıa Respýblıkasy arasyndaǵy senimdi kópirge aınala alady.
– Kásibı tájirıbe almasý, birlesken aqparattyq jobalar jáne mádenı bastamalardy ilgeriletý arqyly medıa bizdiń elder arasyndaǵy áriptestik pen senimdi nyǵaıtýǵa eleýli úles qosa alady, – dep atap ótti Aju News Corporation tóraǵasy.
Memorandýmdy iske asyrý Qazaqstandaǵy mańyzdy jańalyqtardyń Azııa aqparattyq keńistigine taraýyn keńeıtedi, sondaı-aq eki el aýdıtorııasyna Qazaqstan men Koreıa Respýblıkasynyń áleýmettik-ekonomıkalyq, qoǵamdyq-saıası jáne mádenı damýy týraly aqparattarmen keńirek tanysýǵa múmkindik beredi.
Koreıalyq BAQ-pen yntymaqtastyqty damytý QR Prezıdenti Teleradıokesheniniń halyqaralyq seriktester aıasyn keńeıtý jáne Atlant muhıtynan Tynyq muhıtyna deıingi qurlyqta biryńǵaı seriktestik jelisin qurý jónindegi keshendi baǵdarlamasynyń bir bóligi sanalady.
Aıta keteıik, qazirgi ýaqytta QR Prezıdenti Teleradıokesheniniń halyqaralyq seriktestik jelisine álemniń ártúrli óńirlerinen shamamen 70 sheteldik medıa qurylym kiredi. Olardyń qatarynda CMG, TASS, Al Jazeera, Yonhap, Kyodo, Jiji Press, Agenzia Nova, Anadolu Agency, ANI, Associated Press of Pakistan, BRIKS TV jáne basqa da BAQ-tar bar.
Anyqtama:
QR Prezıdentiniń Teleradıokesheni – barlyq medıajúıelerde medıakontent óndirý men taratýdyń tolyq tsıklin qamtıtyn Qazaqstandaǵy eń iri tik ıntegratsııalanǵan medıakompanııa. Kompanııa quramyna Jibek Joly telearnasy men Jibek Joly radıosy, Silk Way, Silk Way Cinema, Silk Way Prime halyqaralyq arnalary, Kazinform halyqaralyq aqparat agenttigi, Derekti kıno ortalyǵy jáne TRKLAB tsıfrlyq bólimshesi kiredi.
Aju News Corporation – Koreıadaǵy iri medıakonglomerattardyń biri. Onyń quramyna panazııalyq Aju Press aqparat agenttigi, Koreıadaǵy alǵashqy salalyq ekonomıkalyq AI Business Channel telearnasy, Dongbangseong medıa platformasy, Aju Business Daily, Economic Daily, Aju Law & Politics tsıfrlyq jáne baspa basylymdary, sondaı-aq jeke jasandy ıntellekt zerthanasy kiredi. Kompanııa materıaldary koreı, aǵylshyn, qytaı, japon jáne vetnam tilderinde jarııalanady. Ol Ońtústik Koreıa men Azııa elderindegi saıası, ekonomıkalyq, ındýstrııalyq jáne mádenı oqıǵalardy qamtıdy.
