QR Prezıdentiniń Teleradıokesheni men Al Jazeera ekinshi birlesken jobany qolǵa aldy
ASTANA. KAZINFORM – QR Prezıdentiniń Teleradıokesheni men Al Jazeera Media Network Yntymaqtastyq týraly memorandým boıynsha jumysty jalǵastyrýda. 2024 jyldyń aqpan aıynda QR Prezıdenti Qasym-Jomart Toqaevtyń Qatar eline memlekettik sapary sheńberinde tıisti qujatqa qol qoıyldy.
Buǵan deıin qos medıa-kompanııanyń alǵashqy birlesken qadamy – «Al Jazeera-men bir apta» jobasy júzege asqan bolatyn. 2024 jyly sáýir aıynda Maqsut Narikbayev University halyqaralyq jýrnalıstıka mektebiniń 100-den astam stýdenti álemdik deńgeıdegi jýrnalıster men oqytýshylardan 1 apta dáris tyńdady.
Sondaı-aq joba aıasynda Al Jazeera-nyń bilikti mamandary, Al Jazeera Media Network bas dırektory Mostefa Sýaga qazaqstandyq jýrnalıster men medıa salasynyń ókilderi úshin 4 kópshilik dáris ótkizdi.
Yntymaqtastyq týraly memorandýmdy júzege asyrýdaǵy kelesi praktıkalyq qadam – QR Prezıdentiniń Teleradıokesheni jýrnalısterin Al Jazeera medıa-ınstıtýtynda oqytý. Jaqyn arada Dohadaǵy Al Jazeera Media Network fılıaldarynda qazaqstandyq jýrnalısterge arnalǵan jeke kúndizgi oqytý baǵdarlamasy uıymdastyrylady.
QR Prezıdentiniń Teleradıokesheni dırektory Raýshan Qajybaeva men Al Jazeera Media Network bas dırektory Mostefa Sýaganyń kezdesýi barysynda oqý baǵadarlamasy egjeı-tegjeıli talqylandy.
– Al Jazeera – álemdegi salmaǵy basym BAQ. Kompanııalar arasyndaǵy serpindi damý otandyq medıanyń órkendeýine jáne telearnalardyń kásibı óristeýine yqpal etedi, – dedi Raýshan Qajybaeva.
– Oqýǵa jiberilgen barlyq jýrnalıst aǵylshyn tilin kásibı deńgeıde meńgergen, IELTS deńgeıi 6.5-ten kem emes. Barlyq áriptes elge oralǵan soń QR Prezıdentiniń Teleradıokeshenindegi qyzmetin jalǵastyrady, – dep qosty qazaqstandyq medıaholdıng basshysy.
Aıta keteıik, QR Prezıdentiniń Teleradıokesheni jýrnalısteriniń Al Jazeera Media Institute bazasynda bilim alýy – kompanııalardyń qazaqstandyq jýrnalıstıka salasynyń kásibı quzyretin ilgeriletýge baǵyttalǵan ekinshi mańyzdy jobasy.
Qazaqstandyq jýrnalıstıkanyń kásibı quzyrettiligin damytýǵa baǵyttalǵan birlesken jobalar serııasy kelesi jyly da jalǵaspaq. Taraptar 2025 jyldyń sáýir aıynda Astanada ekinshi Al Jazeera aptalyǵyn ótkizýge kelisti. Qatar medıa-korporatsııasynyń mamandary MNU halyqaralyq jýrnalıstıka mektebiniń stýdentteri úshin birqatar sheberlik sabaqtary men semınarlar ótkizedi.
QR Prezıdentiniń Teleradıokesheni Qazaqstandaǵy eń aýqymdy medıa-kompanııanyń biri sanalady. Quramyna Jibek Joly, Silk Way, Silk Way Cinema telearnalary jáne eldegi eń eski «Kazinform» halyqaralyq aqparat agenttigi men Derekti fılmder ortalyǵy kiredi.
Al Jazeera Media Network – 1996 jyly Qatar Ámiriniń jarlyǵymen qurylǵan halyqaralyq telekompanııa. Telekompanııa arab, aǵylshyn tilinde álemniń kóptegen eline habar taratady, 50-den astam sheteldik bıýrosy bar. Kompanııanyń derekti fılmder kontenti Al Jazeera Documentary telearnasynan taratylady.