QR Prezıdentiniń is basqarmasy Medıtsına ortalyǵy mamandary Jambyl oblysynda 32 ota jasady

Óńirlerdegi densaýlyq saqtaý salasyn damytýǵa, otandyq medıtsınanyń deńgeıin kóterýge, halyqqa joǵary sapaly kómek kórsetýge baǵyttalǵan aýqymdy shara aıasynda QR PІB Medıtsına ortalyǵynyń Jambyl oblysyndaǵy kúnderi ótti, dep habarlaıdy QazAqparat.

Medıtsınalyq ortalyqtyń aýrýhanalarynyń dárigerleri oblys turǵyndaryna 32 operatsııa jasady, konsýltatsııalyq kómek kórsetý úshin 60-qa jýyq qabyldaý ótkizdi.

Úzdik neırohırýrg, ýrolog, gınekolog jáne basqa da mamandar uıymdastyrǵan prezentatsııalar men sheberlik sabaqtaryna 600-ge jýyq tyńdaýshy qatysty.

Bir aptaǵa sozylǵan is-sharaǵa Medortalyqqa qarasty aýrýhanalar ǵana emes, basqa da vedomstvolyq mekemeler atsalysty. Atap aıtqanda «Qarlyǵash» balabaqshasynyń ókilderi oblys ortalyǵyndaǵy 3 balabaqshanyń jumysymen tanysyp, jergilikti áriptesterimen dóńgelek ústel ótkizdi.

Medıtsınalyq tehnologııalar jáne aqparattyq júıeler ortalyǵynyń qyzmetkerleri óńirdegi medıtsınalyq nysandarda óz qyzmetteri men múmkindikteri týraly tanystyrylym jasady. Sanıtarııalyq-epıdemıologııalyq saraptama ortalyǵy halyqaralyq tájirıbelerdi qoldana otyryp, oblystyń bıznes ókilderi men medıtsına qyzmetkerlerine kásibı deńgeıdi arttyrýǵa arnalǵan sheberlik sabaqtaryn ótkizdi.

Sapar aıasynda QR PІB Medıtsınalyq ortalyǵy men Jambyl oblysynyń ákimdigi arasynda Ózara yntymaqtastyq týraly memorandýmǵa qol qoıyldy.

Buǵan deıin Medortalyq mamandary Aqtóbe, Aqmola, Shyǵys Qazaqstan, Atyraý, Qostanaı oblystary men Shymkent qalasyna barǵan bolatyn. Jyl sońyna deıin elimizdiń barlyq óńirlerin qamtý josparlanyp otyr.