QR Prezıdentiniń keńesshisi jurtshylyqty kitapty kóp oqýǵa shaqyrdy
ASTANA. KAZINFORM – QR Prezıdentiniń keńesshisi Málik Otarbaev Ulytaý oblysyna sapary aıasynda ótken aımaq jurtshylyǵymen kezdesýde jastardy kitap oqýǵa shaqyrdy.
Oblys ákimdiginiń baspasóz qyzmeti málim etkendeı, óńirdiń ardagerleri, qoǵamdyq uıym ókilderi, jastar qatysqan jıynda Málik Otarbaev Ulttyq quryltaıdyń úshinshi otyrysynda kóterilgen máseleler men bastamalardyń júzege asý barysyna toqtaldy.
«Memleket basshysy halqymyzdyń ozyq oıly ultqa aınalýynyń tóte joly kitap oqý ekenin aıtqanyn bilesizder. Internet pen áleýmettik jeli árıne, ómirimizde óz ornyn alyp úlgerdi. Alaıda olar kitap beretin rýhanı qundylyqtardy syılaı almaıdy. Sondyqtan osy jerde otyrǵan jastar qaýymyn kitapty kóp oqýǵa, ony kúndelikti ómir saltyna aınaldyrýǵa shaqyramyn»,- dedi kezdesýde Málik Otarbaev.
Memleket basshysynyń keńesshisi sapar barysynda oblystyń ımamdarymen de kezdesti. Kezdesýge Ulytaý oblysy aýmaǵynda qyzmet etip turǵan meshitterdiń bas ımamdary qatysty. Onda Memleket basshysynyń Ulttyq quryltaıdyń «Adal adam-Adal eńbek-Adal tabys» úshinshi otyrysynda dástúrli dinı qundylyqtarymyzǵa qatysty aıtqan oılary talqylandy.
Oblysqa jumys sapary barysynda Prezıdent keńesshisi «Joshy han» tarıhı-mádenı kesheni, Alashahan, Dombaýyl keseneleri men Ulytaý aýdanynda bolyp, tarıhı oryndardy aralady.
