QR Prezıdentiniń Baspasóz hatshysy jazýshy Kemel Toqaevtyń arhıvtegi sýretterin jarııalady
ASTANA. KAZINFORM - QR Prezıdentiniń keńesshisi- Baspasóz hatshysy Rýslan Jeldibaı Facebook paraqshasynda Kemel Toqaevtyń 1984 jyly Mańǵystaýda túsken sýretterin jarııalady.
Sýretterde Qazaqstan Prezıdentiniń ákesi, tanymal jazýshy, redaktor, Uly Otan soǵysyna qatysýshy Kemel Toqaev tur. Sýretter 1984 jyly Mańǵystaýda túsirilgen.
- Maıdanger-jazýshy Kemel Toqaev Mańǵystaýda, 1984 jyl,- dep jazdy Rýslan Jeldibaı áleýmettik jelidegi paraqshasynda.
Kemel Toqaev kórkem sózdiń sheberi, dramatýrg, qazaq prozasyndaǵy detektıv janrynyń negizin qalaýshy, Uly Otan soǵysynyń qatysýshysy. Onyń alǵashqy «Juldyzdy joryq» jınaǵy 1954 jyly jaryq kórdi.
Jazýshynyń «Soldat alysqa ketti», «Arnaýly tapsyrma», «Sońǵy soqqy», «Túnde atylǵan oq», «Sarbaǵanda bolǵan oqıǵa» sııaqty romandary men povesteri jáne ózge de shyǵarmalary tek Qazaqstanda ǵana emes, elimizden tys jerlerde de tanymal.
Uly Otan soǵysynyń І jáne ІІ dárejeli ordenderimen, eki márte «Erligi úshin» medalimen marapattalǵan.
Soǵystan soń jazýshy respýblıkalyq gazetterde jaýapty qyzmetterdi atqardy. 1980-1984 jyldary Qazaqstan jazýshylar odaǵynyń ádebı keńesshisi boldy.