QR Prezıdentine senim gramotalaryn tabystaý rásimine daıyndyq qalaı júrgiziledi
Qazaqstan Prezıdentine senim gramotalaryn tabystaý rásimin uıymdastyrýmen kóptegen memlekettik qyzmetshiler, onyń ishinde hattama qyzmeti de aınalysady. Memlekettik hattama basshysynyń orynbasary Almas Aıýbaev elshilermen nusqaý men daıyndyq qalaı ótkeni týraly aıtyp berdi, dep habarlaıdy QazAqparattyń menshikti tilshisi.
«Búgin biz Prezıdentke senim gramotalaryn tabystaý rásimin ótkizemiz. Bul – ár elshi men dıplomattyń mansabyndaǵy mańyzdy is-shara. Keıingi 2-3 kún boıy hattama qyzmeti elshilerge nusqaý berýmen aınalysty. Biz is-sharaǵa daıyndaldyq. Senim gramotalaryn tabystaýdyń ereksheligi kóp. Ár eldiń ózgesheligi bolady. Qazaqstanda da dál solaı», – dedi Almas Aıýbaev.
Onyń sózinshe, búgingi rásimniń ereksheligi – qatysatyn elshiler sanynda. Saltanatty sharaǵa álemniń 14 eliniń, onyń ishinde Shveıtsarııa, Lıtva, Chehııa, Úndistan, Iordanııa, Nıderland, Vatıkan, Slovenııa, Ýganda, Gana, Ýrýgvaı, Efıopııa, Danııa men Nepal elshiliginiń ókilderi keldi.
«Syrtqy ister mınıstrliginiń hattama qyzmeti, Prezıdent ákimshiligi áriptesterimizben birge syzbasyn, stsenarııin jasap, barlyq elshige nusqaýlyq jasady. Búgin – erekshe kún, 14 elshi tabystaıdy. Bul kóp ýaqyttan beri birinshi ret bolyp tur. Jeti elshiniń rezıdentsııasy Astanada, taǵy jeteýiniki basqa elderde ornalasqan», - dep tolyqtyrdy Almas Aıýbaev.
Senim gramotalaryn tabystaý kontseptsııasy álem boıynsha bekitilgen. Ony ótkizý kezinde ár eldiń ereksheligi men basqa da mańyzdy nárseler eskeriledi. Memlekettik hattama qyzmetiniń ókili Qazaqstandaǵy hattama erekshelikterine toqtaldy.
«Hattama men jalpy rásimniń ereksheligine keler bolsaq, kóp jaǵdaıda kontseptsııa álem boıynsha bekitilgen úlgimen ótkiziledi, ıaǵnı birdeı bolady. Biraq ulttyq erekshelik, ǵımarattyń qurylysy, memlekettik sımvol elementterin paıdalanýmen ózgeshelenedi. Elshiler Aqordaǵa kele sala mindetti túrde týymyzǵa qurmet kórsetip, Qazaqstannyń ánuranyn tyńdaıdy. Sondaı-aq birinshi qabatta ulttyq ulan qatysýymen bólek rásim ótedi», - dep málim etti memlekettik hattama basshysynyń orynbasary.
Hattama qyzmetiniń ókili elshilerdiń kelý jáne olardy sapqa turǵyzý tártibi týraly aıtty. Shyǵý, shaqyrý jáne senim gramotalaryn tabystaý elshilerdiń elge kelgen ýaqytyna qaraı ár mınýtyna deıin bekitiledi.
Elshi Prezıdentke senim gramotalaryn tabystaǵannan keıin resmı túrde óz qyzmetin oryndaýǵa kirisedi. Rásimdi ótkizý kezinde elshini jóneltýge de daıyndyq júrip jatady.
«Osy ýaqytta áriptesterimiz, ıaǵnı memlekettik hattama qyzmeti jóneltý sátin daıyndaıdy, soǵan sáıkes, týdy shyǵaramyz. Senim gramotalaryn tabystaǵannan keıin elshiler jol polıtsııasynyń ilesip júrýmen óz eliniń týy bar rezıdentsııaǵa barady», - dep atap ótti Almas Aıýbaev.
