QR Prezıdentiniń Joldaýyn arab áleminde keńinen talqylap jatyr
Atap aıtqanda, BAÁ-niń WAM aqparat agenttigi (Emirates News Agency) Joldaýdyń arab tilindegi mátinin taratyp, táýelsiz memleket ornaǵan kúnnen bastap Qazaqstannyń Tuńǵysh Prezıdenti júrgizip otyrǵan kóregen ári teńgerimdi ekonomıkalyq, syrtqy saıası jáne konfessııaaralyq saıasatty joǵary baǵalady, dep habarlaıdy QR SІM baspasóz qyzmeti.
Birikken Arab Ámirlikteriniń «ál-Ittıhad» («Odaq») federaldyq resmı gazeti «Qazaqstan Prezıdenti memlekettiń odan ári damýyna baǵyttalǵan jańa bastamalarǵa shaqyrady» degen maqala jarııalady. Atalǵan maqalada Qazaqstan basshysy Nursultan Nazarbaev óziniń halqyna arnalǵan joldaýda geosaıası qysym men álemdik naryqtarda daǵdarystardyń órshigen jaǵdaıda ishki, aımaqtyq jáne halyqaralyq aspektilerdi ashyq túrde qozǵap otyrǵan kóregen strateg retinde sıpattaldy. Sonymen qatar, basylym atap ótkendeı, Qazaqstan Prezıdenti shynaıy kóshbasshy bola turyp, ósip bara jatqan turlaýsyzdyq jaǵdaıynda qazaqstandyqtardyń ál-aýqatyn arttyrý men halyqaralyq qaýipsizdikti nyǵaıtý maqsatynda durys sheshimder qabyldaýda jáne aldaǵy jyldarǵa el ekonomıkasynyń qarqyndy ósý kókjıekterin dál belgileýde.
Eldiń taǵy bir jetekshi basylymy - «ál-Baıan» («Jarshy») gazeti dostas Qazaqstannyń damýyndaǵy jańa kezeńniń belgisi bolyp sanalatyn 2015 jylǵa arnalǵan qujattyń áleýmettik-ekonomıkalyq baǵytyna erekshe nazar aýdardy.
Dýbaı Ámirliginiń resmı basylymy Memleket basshysynyń «Jańa ekonomıkalyq saıasatqa sáıkes, kólik jelisi men ınfraqurylymdy damytýǵa, atap aıtqanda jańa avtomobıl, temir jol men áýe magıstraldaryn salýǵa erekshe kóńil bólinedi» degen sózin keltire otyryp, utymdy sheshimniń strategııalyq tereńdigin atap ótti. «ál-Baıan» gazeti óz oqyrmandarynyń nazaryn Qazaqstan odan ári tranzıttik ınfraqurylymnyń álemdik jelisine qosylyp, álemdik geoekonomıkanyń mańyzdy múshesine aınalatyndyǵyna aýdardy.
