QR Prezıdentiniń Jarlyǵymen Anzar Musahanov Almaty oblysynyń ákimi qyzmetine taǵaıyndaldy
ASTANA. 13 sáýir. QazAqparat - Memleket basshysy «A.T. Musahanovty Almaty oblysynyń ákimi qyzmetine taǵaıyndaý týraly» Jarlyqqa qol qoıdy, dep habarlady QR Prezıdentiniń baspasóz qyzmeti.
Anzar Tursynhanuly Musahanov Almaty oblysynyń ákimi bolyp taǵaıyndalsyn.
Qazaqstan Respýblıkasynyń Prezıdenti N.Nazarbaev
Astana, Aqorda, 2011 jylǵy 13 sáýir. № 52
Anzar Tursynhanuly MUSAHANOV
1966 jyly týǵan, Almaty zootehnıkalyq-maldárigerlik ınstıtýtyn, Qazaq ulttyq agrarlyq ýnıversıtetin bitirgen, mamandyǵy boıynsha - mal dárigeri, memlekettik jáne jergilikti basqarý menedjeri. Aýyl sharýashylyǵy ǵylymdarynyń kandıdaty ǵylymı dárejesi bar.
Instıtýtty bitirgennen keıin Almaty oblysynda keńshardyń bas mal dárigeri, keıin Kúrti aýdanynyń bas mal dárigeri, Temir jol aýyldyq okrýginiń ákimi, Aqseńgir tájirıbe sharýashylyǵynyń dırektory boldy. Respýblıka Aýyl sharýashylyǵy mınıstrliginiń Qarasaı aýdandyq aýmaqtyq basqarmasynyń bastyǵy, Іle aýdany ákiminiń orynbasary qyzmetterin atqardy. Jambyl jáne Qarasaı aýdandarynyń ákimi, Qazaqstan Respýblıkasy Prezıdenti Ákimshiliginiń memlekettik ınspektory laýazymdaryna taǵaıyndaldy.
Sońǵy kezde - Almaty oblysy ákiminiń orynbasary.
