QR Prezıdentiniń janyndaǵy Sybaılas jemqorlyqqa qarsy kúres máseleleri jónindegi komıssııanyń kezekti májilisi boldy
ASTANA. 12 qarasha. QazAqparat - Aqordada Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevtyń tóraǵalyq etýimen Qazaqstan Respýblıkasy Prezıdentiniń janyndaǵy Sybaılas jemqorlyqqa qarsy kúres máseleleri jónindegi komıssııanyń kezekti májilisi bolyp ótti.
Otyrysta agrarlyq sektor men qurylys salasyndaǵy sybaılas jemqorlyqqa qarsy is-qımyl jónindegi is-sharalar talqylandy. Aýyl sharýashylyǵy mınıstri Aqylbek Kúrishbaev pen Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın baıandama jasady.
Q. Saýdabaev aýyl sharýashylyǵy salasynda sybaılas jemqorlyqqa qarsy is-qımyl memlekettiń azyq-túlik qaýipsizdigin qamtamasyz etýdiń jáne otandastarymyzdyń ál-aýqatyn arttyrýdyń mańyzdy faktory bolyp tabylatynyn atap ótti. Sondyqtan agrarlyq sektor men aýyldardy damytý Memleket basshysy Nursultan Nazarbaevtyń basty basym baǵyty bolyp tabylady. Prezıdenttiń tapsyrmasy boıynsha osy maqsattarǵa bıýdjetten qajetti qarjylar bólinýde. Atalǵan salaǵa salynǵan árbir teńge aýyldyń qaıta jandanýyna, elimizde molshylyqtyń bolýyna qyzmet etýi kerek.
- Álemdik qarjy daǵdarysyn eńserýge baılanysty Qazaqstannyń qurylys ındýstrııasyndaǵy taıaýdaǵy qarjy daǵdarysynyń zardaptary bárimizdiń esimizde. Osy kezde Prezıdent bul maqsattarǵa buryn-sońdy bolmaǵan mólsherde qarajat bóle otyryp, ekonomıkamyzdyń osy sektoryna barlyq qajetti qoldaýyn kórsetti. Sol sebepten bul arada sybaılas jemqorlyqqa jol berilgen joq. Barlyq qurylys nysandary sapaly, ýaqtyly jáne únemdi salynýy kerek, - dep atap ótti Memlekettik hatshy - Syrtqy ister mınıstri.
Otyrystyń qorytyndysy boıynsha, Komıssııa tarapynan memlekettik organdarǵa agroónerkásip kesheni salasynda sybaılas jemqorlyqty joıý, tıisti kadr saıasatyn júrgizý, sondaı-aq memlekettik organdardyń- ákimshilerdiń ınvestıtsııalyq jobalar baǵdarlamalaryn iske asyrý úshin qurylys nysanynyń qunyna, sapasyna jáne merzimine baqylaýdy kúsheıtý jóninde qajetti sharalardy qabyldaý usynyldy.
