QR Prezıdentiniń janyndaǵy Memlekettik basqarý akademııasynda memlekettik qyzmetshilerdiń biliktiligin arttyrý semınary ótýde
ASTANA. 11 qarasha. QazAqparat - Qazaqstan Respýblıkasy Prezıdentiniń janyndaǵy Memlekettik basqarý akademııasy 003 bıýdjettik baǵdarlamasy sheńberinde aǵymdaǵy jyldyń 11-15 qarashasy aralyǵynda memlekettik qyzmet salasyndaǵy Astana Óńirlik haby hatshylyǵynyń qoldaýymen «Memlekettik organdar qyzmetindegi menedjment» taqyrybynda semınar ótkizedi, dep habarlaıdy akademııanyń baspasóz qyzmetinen.
Semınarǵa elimizdiń memlekettik organdarynyń qyzmetkerlerimen birge hab qatysýshy elderi - Belarýs, Armenııa, Tájikstan, Ýkraına, Ázirbaıjan men Qyrǵyzstannyń memlekettik qyzmetshileri qatysady.
Semınardyń ashylýynda Qazaqstan Respýblıkasy Memlekettik qyzmet isteri agenttiginiń tóraǵasy Báımenov Alıhan Muhamedııauly, QR Prezıdentiniń janyndaǵy Memlekettik basqarý akademııasynyń rektory Ábdirásilov Bolatbek Serikbaıuly quttyqtaý sóz sóıledi.
Semınardy álemge tanymal sarapshy, Vıktorııa Vellıngton Ýnıversıtetiniń (Jańa Zelandııa) professory Rodnı Dormer ótkizedi.
Memlekettik organdar qyzmetindegi menedjment josparlaý, uıymdastyrý, úılestirý, ýájdeme jáne baqylaý sekildi negizgi fýnktsııalar arqyly iske asyrylady. Basqarýshylyq eńbek bólinisi uıymdyq qurylymda, al qaıtalanatyn jáne standartty is-áreketter ákimshilik rásimderde normatıvti túrde bekitiledi.
Akademııa halyqaralyq tájirıbeni nazarǵa ala otyryp, memlekettik basqarýdyń úzdik halyqaralyq tájirıbesine baǵdarlanǵan jáne memlekettik organdar qyzmetiniń salalyq ereksheligi men qyzmetshilerdiń kásibı qajettilikterin qamtıtyn qazirgi zamanǵy oqý baǵdarlamalaryn ázirledi.
Semınar memlekettik sektordaǵy menedjmenttiń erekshelikteri men máselelerin zerdeleý, qyzmet tıimdiligin baǵalaýǵa arnalǵan krıterıılerdi túsindirý, eseptilikti daıyndaý jáne usyný protsesterin talqylaý, sondaı-aq Jańa Zelandııa úlgisinde memlekettik sektor qyzmetiniń tıimdiligin basqarý máselelerin qarastyrý boıynsha birqatar problemalardy talqylaýǵa arnaldy.
Semınar sońynda tyńdaýshylarǵa sertıfıkattar tapsyrylatyn bolady.
