QR Prezıdentiniń Teleradıokesheni men Saýd aqparat agenttigi yntymaqtastyq týraly memorandým qabyldady

NUR-SULTAN. QazAqparat – «Qazaqstan Respýblıkasy Prezıdentiniń Teleradıokesheni» KEAQ pen «Saýd Arabııasynyń aqparat agenttigi» arasynda aqparat almasý salasyndaǵy ózara túsinistik jáne yntymaqtastyq týraly memorandýmǵa qol qoıyldy, dep habarlaıdy QazAqparat tilshisi.

Qujat búgin Memleket basshysy Qasym-Jomart Toqaevtyń Saýd Arabııasyna sapary aıasynda rásimdeldi. Memorandýmǵa «Qazaqstan Respýblıkasy Prezıdentiniń Teleradıokesheni» KEAQ-nyń bas dırektory Raýshan Qajybaeva men Saýd Arabııasy aqparat agenttiginiń prezıdenti Fahad Bın Hasan Al Ogran qol qoıdy.

Ózara túsinistik týraly memorandýmnyń maqsaty – eki el arasyndaǵy ózara túsinistikti nyǵaıtýǵa yqpal ete otyryp, aqparattyq materıaldarmen almasý salasyndaǵy taraptardyń yntymaqtastyǵyn damytýǵa negiz qalyptastyrý. Taraptar aqparattyq materıaldarmen jáne fotosýrettermen almasady. Olar aqparatty ózderiniń aqparattyq resýrstarynda paıdalanýǵa quqyly. Eki tarap memleketterinde bolyp jatqan resmı saparlar men mańyzdy oqıǵalardyń fotosýretterimen tegin almasa alady.

Saýd aqparat agenttigi 1970 jyly sol kezdegi eldiń Premer-Mınıstriniń sheshimimen Saýd Arabııasyndaǵy birinshi ulttyq aqparat agenttigi retinde qurylǵan. Agenttiktiń negizgi maqsaty jergilikti jáne halyqaralyq aqparattyq materıaldardy jınap, Saýd Arabııasynda jáne shetelde taratýda ortalyq organ bolý edi.

2012 jyldyń mamyr aıynyń sońynda Saýd Arabııasy Mınıstrler keńesi agenttikti eki táýelsiz organǵa bólý týraly sheshim qabyldady. Osylaısha, Saýd televıdenıesi men radıosy jáne Saýd aqparat agenttigi quryldy.

SAA ulttyq, óńirlik jáne halyqaralyq deńgeıdegi máselelerdi, ásirese Koroldikpen baılanysty oqıǵalardy qamtıdy. Sonymen qatar eldegi jýrnalıstik qyzmettiń nyǵaıýyna septigin tıgizedi. Agenttik arab, aǵylshyn, frantsýz, orys, qytaı jáne parsy tilderinde aqparat taratady. Osy jyldyń sońyna deıin 10 tilde habar taratýdy josparlap otyr.